Eusko Jaurlaritzak aurrekontuen negoziazioen barruan PP+C's-i 2 urteko ikasgelak ere ituntzeko eskaini izana erreakzioak eragiten ari da oraindik. Steilasek, esaterako, ohar bidez adierazi du ez daudela ados neurri horrekin: «Gertatutakoak agerian uzten du, beste behin ere, hezkuntza ituna ke laino bat besterik ez dela». Eta iruditzen zaio akordioaren bidez EAJ bere «benetako asmoa» ezkutatzen ari dela; alegia, «sare pribatua babestea».
Jaurlaritzari «gezurretan» aritzea ere egotzi dio sindikatuak. Izan ere, azaldu dutenez, Hezkuntza Sailak esan du ekainean jada jakinarazi zutela 2 urteko gelak ere itunduko dituztela. Sindikatuaren esanetan, baina, 2021eko abenduan ondu zuten neurria arlo pribatuko patronalarekin, eta 2022-2023ko ikasturterako onarpen aginduan jaso zuten. Ondoren, ekainaren 21ean argitaratu zuten aldizkari ofizialean, 2022tik 2028ra bitarteko seiurtekorako itunen dekretuaren bidez. Gaineratu duenez, Eusko Jaurlaritzaren Hezkuntza Legearen aurreproiektuak ere aipatzen du: «Jasotzen zuen horiek 2023ko irailaren 1etik aurrera aplikatuko zirela; hau da, 2023-2024ko ikasturterako. Beraz, neurri hori negoziazio mahaian eskumako alderdiei eskaintzeko bezain atzerakoia bada ere, lege proiektua negoziatzeko prozesuan hartu da».
Gainera, segregazioari aurre egiteko ere ez zaie balekoa iruditzen: «Itunpeko ikastetxeen kopurua handitzea ote EAJrentzat segregazioaren aurka borrokatzeko tresnarik onena?». Egokiagoa iruditzen zaie ikastetxe pribatuetako 0-2 urteko etapari diru laguntzak kentzea, esaterako.
EAJren joera ikusita, Steilasek gainerako alderdiei eskatu die jarrera hartzeko. Izan ere, sindikatuaren irudiko, ez dago «erdibidean» geratzerik: «Herri honetako ezkerreko alderdiek erabaki beharko dute EAJrekin edo Euskal Eskola Publikoarekin lerrokatzen diren». Eta beste eskaera bat eginda amaitu dute: «Inoiz baino gehiago, premiazkoa da Euskal Eskola Publikoaren aldeko jarrera irmoa erakustea; bestela, Jaurlaritza gauzatzen ari den eta betikotu nahi duen hezkuntza politika pribatizatzailearen konplizeak izango baikara».
