Lannemezango espetxetik (330 kilometro) bueltan istripua izan zuen Ihintza Bidarte Xabier Goienetxea euskal presoaren bikotekideak larunbat iluntzean, Etxerat-ek jakinarazi duenez. A-64 autobidean gertatu zen, Hastinga aldean. Ez zuen «kalte fisikorik» izan, eta taxi batean itzuli zen etxera. «Orkatz handi bat gurutzatu zen bat-batean autoaren aurrean, eta, talkaren ondorioz, aurreko txapa kaltetuta gelditu zen, eta motorrari ere eragin zion talkak», zehaztu du presoen senideen elkarteak.
Kolpea izan eta gero ere aurrera jarraitu zuen Bidartek, harik eta kilometro batera zegoen gasolindegi batean «istripuaren osteko kudeaketa» egin zuen arte, Etxerat-ek azaldu duenez. Atzo, ospitalera joan zen, aztertu zezaten.
«Ihintza Bidarterena urteko bigarren auto istripua izan da, baina iaz lau auto istripu gertatu ziren, eta, orotara, laurehun bat ezbehar izan dira urrunketa politika indarrean denetik. Kaltetutako senide eta lagunak mila inguru izan dira, eta, tamalez, hamasei senide eta lagunen bizitzak bidean geratu dira. Ezin da horrelakorik errepikatu», salatu du Etxerat-ek, eta gehitu «garaia» dela preso guztiak Euskal Herriratzeko eta preso, iheslari eta deportatuen «etxerako bideari oztoporik ez jartzeko».