Lehenik, udazkenerako agindu zuten. Gero, 2022. urtea bukatzerako. Baina gaur Bingen Zupiria Eusko Jaurlaritzaren bozeramaileak aitortu duenez, gustatuko litzaieke Hezkuntza Lege proiektua 2023ko lehen hiruhilekoan onartzea gobernu kontseiluan.
Eusko Jaurlaritzak irailean aurkeztu zuen Hezkuntza Legearen aurreproiektuaren lehen zirriborroa, eta hura oinarri dutela ari dira eztabaidan. Jokin Bildarratz Hezkuntza sailburuak esan zuenez, 35 eragileren edo norbanakoren ekarpenak jaso dituzte. Zupiriak gogorarazi du horiek aztertzeko garaia dela orain.
Testuak zenbait kritika jaso ditu, eta, desadostasunaren erakusgarri, ELAk, LABek eta Steilasek grebara deitu dute sare publikoan biharko. Zupiriaren irudiko, deialdia ez da ulergarria, eta sindikatuek «presioa» egitea aukeratu dute «negoziatu beharrean», «EH Bilduk eta Elkarrekin Podemos-IUk hezkuntza akordioaren parte izatea berriro planteatzeko». Biharkoa ez da eskola publikoetan egin duten lehen greba izango: azaroaren 30ean ere kaleak hartu zituzten aurreproiektuaren aurka.
