Bizkaiko metalgintzako sindikatuek eta FVEM patronalak oraindik ez dute lortu akordioa egitea 52.000 langileri eragiten dien lan hitzarmena berritzeko. Azaro amaierako grebaren osteko lehen bilera egin dute, eta ez da adostasunik egon. Sindikatuek salatu dute patronalak ez duela aldatu bere azken eskaintza –azaroaren 25ean bildu ziren– eta «esku hutsik» joan dela bilerara. FVEMek, berriz, nabarmendu du «ezin duela gehiago egin» eta langileen ordezkariak ez daudela prest jarrerak gerturatuko lituzketen mugimenduak egiteko. ELAren ustez, greba mugagabera deitzeko garaia iritsi da.
Negoziazio prozesu horren hogeigarren bilera izan da gaurkoa, eta azken bileran CCOO, LAB eta UGT sindikatuen eta patronalaren artean egondako «gerturatzeak» ez du jarraipenik izan. Hiruren artean, ordezkaritzaren %59 dute, akordioa sinatzeko adina. ELAk, berriz, ordezkaritzaren %41 du, eta bere eskaera propioak egiten ari da. Hala ere, negoziazio mahaiak aurrera jarraituko du, eta beste bilera bat egingo dute hilaren 21ean. CCOOk, UGTk eta LABek berriz biltzeko asmoa plazaratu dute, eta FVEMek aurreratu du bileretara joango dela aurrerantzean ere. Hori bai, «entzutera» joango dela iragarri du, enpresak «eskaini dezaketenaren mugan» daudelako. Hala ere, bi aldeek konpromisoa hartu dute eskaintza berriak prestatzeko.
ELAren ustez, FVEMek mahai gainean jarritakoa «oso urrun» dago metalgintzako langileek merezi dutenetik. Era berean, gogoratu du langileek grebaren alde eginez erantzun ziotela azaroaren 25eko eskaintzari, eta berritasunik ezean greba mugagabera deitzeko garaia dela. Bestalde, CCOOk, LABek eta UGTk nabarmendu dute borrokak eragina duela eta ,«beharko balitz», prest daudela greba dinamika luzatzeko. Bizkaiko metalgintzako langileek 11 greba egun egin dituzte aurten, eta, sindikatuen arabera, erantzun zabala izan dute.
