Ehun mugimenduak ekintza bat egin du SAPA arma enpresak Andoainen (Gipuzkoa) duen fabrikaren atarian: «hilotzak» utzi ditu bertan. «Ekoizten duena enpresaren ateetara eramatea erabaki dugu», azaldu du mugimenduak, ohar bidez. «Adierazi nahi izan dugu hilotzak sortzen dituzten enpresek ez dutela euskal errepublikan lekurik izango eta euskal errepublika beharrezkoa dugula gerretatik alde egin eta heriotzaren industriak ixteko».
Izan ere, Ehunek uste du SAPAk «heriotzaren industria» elikatzen duela. «Enpresa horrek lotura zuzena du 78ko erregimenarekin, bere produkzio guztia Espainiako Armadara bideratzen baitu», salatu du. Gainera, mugimenduak salatu du Espainiako Gobernuak gastu militarra %26 handitu duela azken aurrekontuetan, eta, hala, men egin diela NATOren eskariei: «Espainiak erabaki du gerra egitea dela bere etorkizuna. Erabaki du munduko txiroenen aurka egin nahi duela».
Horregatik, premiazkotzat jo du «Espainiatik alde egitea», baldin eta Euskal Herriak «mundu mailako gerra egoeraren parte» izan nahi ez badu. Alde horretatik, «euskal errepublika» armagintza industriari bizkarra emateko tresnatzat jo du mugimenduak: «Euskal errepublika beharrezkoa dugu SAPAren gisako enpresak legez kanpokotzat jo eta bizitzaren alde egiteko. Horregatik, ziur gaude euskal errepublika gauzatzea izango dela munduko bakearen alde egin dezakegun ekintzarik eraginkorrena».
SAPA enpresaren atarira produzitzen dutena eraman diegu.
— Ehun #EuskalErrepublika (@ehunduz) December 30, 2022
Ekintza honekin, nagusitzen ari den gerra egoeratik ateratzeko eta heriotzaren industria legez kanpo jartzeko #EuskalErrepublika behar dugula adierazi nahi izan dugu. pic.twitter.com/4i8aOKGyCL