R.U.S. 56 urteko langilea hil zen atzo arratsaldean Kutxabankek Izarran (Araba) duen bulegoan. LABek jakinarazi duenez, lanean bakarrik ari zela hil zen.
Sindikatuak gogoratu du iaz 23 heriotza ez-traumatiko izan zirela, «arazo kardiobaskularrak eragiten dituzten faktore laboralak tarteko», eta azpimarratu du azken urteetan gehien ugaritzen ari den arrisku faktorea dela. «Ez da kasualitatea Kutxabanken gisako enpresetan arrisku faktore hau areagotu izana, haren pribatizazioak gizartean eragin duen galeraz gain, langileen lan baldintzetan eta bizi kalitatean ere eragina izan baitu. Bulegoak ixteak eta lantaldea murrizteak eragin zuzena izan du lan karga eta erritmoetan, eta horrek lan arriskuak areagotzen ditu».
Eusko Jaurlaritzari eskatu dio halako arriskuei aurre egiteko bitarteko gehiago jartzeko.