EH Bilduk eskatu du debekatzeko administrazio publikoek Stoa enpresarekin kontratuak egitea

Administrazio publikoek Stoa Studio Tecnico de Obras y Arquitectura enpresarekin kontratuak egitea debekatzeko eskatu du gaur Gasteizko EH Bildu udal taldeak. Izan ere, enpresa horren administratzailea Sergio Fernandez Oleaga ustelkeriagatik zigortu dute De Miguel auzian, komisioak ordaintzeagatik –urtebete eta sei hilabeteko kartzela zigorra ezarri diote–. Rocio Vitero zinegotziak proposatu du ustelkeriagatik zigortutako enpresa hori kontratatzeko debekua jasotzea EAEko Lizitatzaileen eta Enpresa Sailkatuen Erregistroan eta ROCELE Espainiako erakundean.

Gasteizko Udaleko sozietate publikoen batzordean egin du eskaera Viterok. Han gogoratu du Amvisa ur sozietateak bi kontratu esleitu zizkiola Stoari, «enpresa ustelkeriagatik ikertzen ari zirenean», baina epaia irmoa ez zela argudiatu zuen Gorka Urtaran alkateak haren defentsa egiteko. «Orain, epai irmoarekin, ez dago zalantzarik, udal honek argi eta garbi jokatu behar du ustelkeriaren aurrean», azpimarratu du EH Bilduko zinegotziak. Hala, «interes publikoaren aurka doazen eta horrekin legez kanpoko onurak atera nahi dituzten praktikak dituztenekin» kontratuak egitea debekatzeko eskatu du.