Urtarrilaren 31n izango da erretretaren erreformaren aurkako bigarren mobilizazio eguna

Lehen xedea aise lortu dute Frantziako sindikatuek: jendetza kalera ateratzea gobernuak indarrean jarri nahi duen erreformaren aurka. Orain bigarren helburu bat dute, aurrenekoa baina zailagoa: erreformaren aurkako mugimendu iraunkor bat osatzea, gobernua makurrarazteko. Dagoeneko jarri dute bigarren hitzordua: urtarrilaren 31n izango da.

Sindikatuen aspaldi ikusi gabeko batasunak isla izan du gaurko protesta egunean. Manifestazio jendetsuak izan ziren Frantziko hiri gehienetan; bi milioitik gora lagun manifestatu direla esan dute sindikatuek, eta kopurua 1,12 milioira murriztu du Poliziak.

Bata edo bestea izan, jende asko izan zela onartu du Olivier Dussopt Lan ministroak. «Bagenekien mobilizazioa garrantzitsua izango zela, erretreta gai berezia delako».

Sindikatuak, pozik

Manifestari gehien Parisen bildu da, 400.000 lagun, CGTren arabera. Han izan dira Frantziako sindikatu nagusietako buruak, pozik mobilizazioak izandako jarraipen zabalarekin. «Inkestetan irakurtzen dugunaren isla izan da mobilizazioa; hau da, herri honetako herritar gehienak erreformaren aurka daude», aldarrikatu du Phillippe Martinez CGTko idazkari nagusiak.

«Erakunde guztiak hemen gaude. Horrek erakusten du jendea sumindua dela», esan du Gaelle Martinez Solidaires sindikatuko idazkariak. «Erretiro ona nahi dugu, ez dugu erretretara hautsita iritsi nahi, nekatuta», gaineratu du Laurent Escure UNSAko buruak.

Manifestazioa, oro har, baketsua izan da, baina izan dira istilu gutxi batzuk ere. Poliziak 38 lagun atxilotu zituen, arma zuriak eramateagatik eta txikizioak egiteagatik.

Macron, irmo

Baina egun bakarreko protestak ez du Emmanuel Macron Frantziako presidentea gibelaraziko. Bartzelonan zela, amore emateko asmorik ez du azaldu Frantziako Errepublikako presidenteak. «Gobernuak erreformarekin jarraituko du, errespetuz, elkarrizketarako asmoarekin, baina irmotasunez eta ardura erakutsiz».

Kaleko protesten «legitimotasuna» onartuta ere, erreformaren izaera «demokratikoa» aldarrikatu du presidenteak, erretreta gibelatzeko asmoa zuela iragarri baitzuen hauteskunde presidentzialetako kanpainan. «Gauzak esan egin behar dira hautaketa demokratikoak egiten direnean. Eta hauteskunde presidentzialetan eta legebiltzarrekoetan gauzak oso argi esan ziren». Gobernuak bere erreforma aurkeztu aurretik sindikatuekin eta patronalekin negoziatu duela gaineratu du, eta orain diputatuen eta senatarien txanda da «proiektua aberasteko». Demokratikoa ez ezik, bidezkoa ere iruditzen zaio erreforma Macroni: «Nahi baduzu belaunaldien arteko ituna justua izatea, erreforma egin egin behar da».