Garrantzitsua zen gaur Etxebarrin (Bizkaia) jokoan zegoen puntua. Sailkapenean seigarren dira Peña II.a eta Mariezkurrena (Eskirozek jokatu du gaur haren lekuan), eta zortzigarren, berriz, Jaka eta Aranguren; hori tarteko, tentsioa nabaria izan da lehen tantoetan. Pixkanaka, ordea, faboritoek lortu dute partida haustea, eta tarte erosoarekin heldu dira azken tantoetara (15-22). Laugarren puntua dute.
Gaur bere atzelari titularra falta zuela jakitun, Peñak hasieratik hartu du bere gain bikotearen pisua. Asko sartu da jokoan, eta sendo jokatu du, huts gutxi eginez. Atzean ere ez du aitzakiarik izan: neurketa serioa jokatu du Eskirozek, eta, pilotari altuera emanda, ez dio jokoan nahi bezainbeste sartzen utzi Jakari.
Gauzak horrela, lehen tantoetan oso parekatua izan da lehia. Urdinek hainbat aldiz hartu dute aurrea, baina berehala gerturatzen ziren gorriak. Lanerdietatik aurrera apurtu da lehia; fisikoki osoago zeudela erakutsi dute Peñak eta Eskirozek, eta hasieran baino gehiago hutsegin dute gorriek.
Azkenean, garaipena eta lehian bizi-bizirik jarraitzeko balio dien puntua Peña eta Eskirozentzat. Jakak eta Arangurenek azken postuan jarraituko dute, puntu bakarrarekin. Bederatzigarren jardunaldiko azken partida zen gaurkoa.
