Albistea entzun

GERRA UKRAINAN

AEBek 31 tanke emango dizkiote Ukrainari, eta Alemaniak hamalau

Berlinek uste du hiru bat hilabete barru egongo direla erabilgarri, eta Bidenek adierazi du denbora beharko dela horiek gerra frontera eramateko. Zelenskik eskerrak eman dizkie, eta nabarmendu du «tanke asko» behar dituztela.

Alemaniako armadaren Leopard 2 tanke bat, ariketa militarrak egiten.
Alemaniako armadaren Leopard 2 tanke bat, ariketa militarrak egiten. EFE

Igor Susaeta -

2023ko urtarrilak 25 18:52

Volodimir Zelenski Ukrainako presidentea aspalditik ari zitzaien esaten Mendebaldeko herrialdeei tankeak bidaltzeko. Azkeneko asteetan Alemaniak fabrikatutako Leopard 2 tankeak eskatu ditu, zehatz-mehatz. Izan ere, horien 2.000 ale baino gehiago daude Europan. Orain gutxira arte, zuhur jokatu dute aliatuek eskaera horren harira, baina aurreko ostiralean AEBek nabarmendu zuten ez dela «mantsotzeko» garaia Errusiaren aurkako borrokan Ukrainari laguntza militarra emateari dagokionez, baizik eta «harago» joatekoa. Beraz, Alemaniak eta AEBek gaur baieztatu dute tankeak entregatuko dizkiotela Ukrainari: hamalau Leopard 2 Berlinek, eta 31 Abrams Washingtonek.

Alemaniak, gainera, gauza bera egiteko baimena eman die Leopard 2 tankeak dituzten herrialdeei — lizentzia akordioen arabera, herrialde ekoizlearen oniritzia behar da horretarako—, eta horietako batzuek, hala nola Finlandiak, Suediak, Norvegiak, Poloniak eta Espainiak, Kievi emateko asmoa agertu dute. Ukrainako gerra, hortaz, beste fase batean sartzear dago, behin Mendebaldeak adostu ondoren borrokarako ibilgailu blindatuak eramatea hara.

Boris Pistorius Alemaniako Defentsa ministroak esan du espero duela Leopard 2 tankeak hiru bat hilabete barru iristea Ukrainara. Argitu du, bide batez, tankeak mantentzeko beharrezko ekipamendua emango diotela Ukrainako armadari, eta soldaduek, aurrena, formakuntza jasoko dutela Alemanian bertan. Joe Biden AEBetako presidenteak plazaratu du asmo bera dutela, eta azpimarratu du Abrams tankeak direla «gaitasunik handienekoak», baita erabiltzeko «oso zailak» ere. Azaldu du, gainera, denbora beharko dela horiek gerra frontera eramateko.

Ikusi gehiago gehiago: Alemaniak atea ireki dio bere baimenik gabe Leopard 2 tankeak Ukrainara bidaltzeari

Mendebaldeak azken hilabeteetan emandako laguntza militarra eskertu izan du Kievek —aireko defentsa sistemak, batez ere—, baina, aldi berean, arma astunak eskatu izan dizkio, argudiatuta Mosku erasoaldi berri bat prestatzen ari dela. Horregatik, Volodimir Zelenski Ukrainako presidentearen kabineteburu Andrei Yermakek eskerrak eman dizkio gaur Alemaniari, «lehen pausoa» emateagatik. Hori bai, Telegramen idatzitako mezu batean nabarmendu du «Leopard gehiago» behar dituela Ukrainak. Armadaren buruzagiak datu bat eman zuen abenduan: NATO Ipar Atlantikoko Itunaren Erakundeko 300 bat tanke behar dituztela Errusiak hartutako lurrak berreskuratzeko. Mendebaldeko zenbait adituk esan izan dute, ordea, horretarako nahikoa direla ehun bat.

Ikusi gehiago: Alemaniaren ustez, aliatuek defentsan aritu beharko lukete Ukrainan, ez erasoan

Olaf Scholz Alemaniako kantzilerrak esan du, gaur, «nazioartearekin» modu koordinatuan jokatuta hartu dutela erabakia, eta, hain zuzen, hori izan da Alemaniako Gobernuak jarri izan duen baldintzetako bat konpromiso hori hartzeko: potentzia militarrek ere beren tankeak bidaltzea Ukrainara. Erresuma Batuak azaldu izan du Challenger tankeak bidaltzeko prest dagoela, eta Emmanuel Macron Frantziako presidenteak adierazi zion, igandean, Alemaniako kantzilerrari, ez duela baztertzen Frantziako armadaren Leclerc tankeak Kievi entregatzea.

Horregatik, Bundestagean, gaur, hitza hartu duenean, Scholzek azpimarratu du Alemania dela, Erresuma Batuarekin batera, Ukrainari arma gehien eman dizkiona. Gogoratu du, bide batez, Alemaniak arau bat «hautsi» behar izan duela horretarako. Bigarren Mundu Gerraz geroztik Alemaniak tradizio antimilitarista eduki du, baina Ukrainan gertatutakoaren harira, agintean dagoen hiru alderdiko koalizioan ika-mikak izan dira. Berdeek eta Liberalek begi onez ikusi dute Ukrainari laguntza militarra ematea, eta SPD Alemaniako Alderdi Sozialdemokratak, berriz, zuhurrago jokatu du, erantzukizun historikoa gogoan.

Ikusi gehiago: Zer dira Leopard-ak?

Pentagonoak ostiralean esan zuen ez zuela asmorik orain Abrams tankeak Ukrainara bidaltzeko. Arrazoi logistikoak aipatu zituen erabakia justifikatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Carles Puigdemont (erdian) Luxenburgoko auzitegiaren epaia baloratzen, gaur, Europako Parlamentuan, inguruan Clara Ponsati, Gonzalo Boye, Lluis Puig eta Toni Comin dituela. ©Berria

Erbesteratu katalanek ezingo dituzte Belgikaren argudioak erabili Llarenaren euroaginduak baztertzeko

Gorka Berasategi Otamendi

Europako Batasuneko Justizia Auzitegiak ebatzi duenez, batasuneko estatu kide batek ezin dio uko egin beste kide baten euroagindu bati, frogatu ezean azken horrek sistematikoki urratzen dituela eskubideak.

AEBetako F-16 hegazkin batzuk ariketa militarrak egiten Hego Korean ©EFE

Ukrainara gerra abioiak bidaltzearen aurka agertu da, oro har, Mendebaldea

Igor Susaeta

Auzia mahai gainean dago, baina Mendebaldeak ez du jarrera bateraturik. Macronen arabera, hainbat aldagai hartu beharko lirateke kontuan borrokarako hegazkinak entregatzeko.

Antony Blinken AEBetako Estatu idazkaria eta Benjamin Netanyahu Israelgo lehen ministroa, atzo, Tel Aviven. ©DEBBIE HILL / EFE

«Lasaitasuna berrezartzeko» eskatu die Blinkenek Israeli eta Palestinari

Mikel Elkoroberezibar Beloki

AEBetako Estatu idazkariak Tel Aviven adierazi du AEBek «Israelgo segurtasunarekin» daukaten konpromisoa «hautsezina» dela. Israelgo armadak gutxienez 35 palestinar hil ditu aurten

Zelenski eta Von der Leyen, iazko apirilean, Kieven ©EFE

Ukrainak bi urteko epean sartu nahi du EBn

Igor Susaeta

Erdoganek adierazi duenez, Suediarekin eta Finlandiarekin batera negoziatu beharrean, bakarka negoziatuko du bi herrialde horiek NATO Ipar Atlantikoko Itunaren Erakundeko kide bihurtzeari buruz.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.