Israelgo armadak hamar palestinar hil ditu bi erasotan

Azken zenbaketen arabera, behintzat hamar palestinar hil dituzte Israelgo militarrek, bi erasotan. Lehen oldarraldian, bederatzi pertsona hil dituzte, tiroz, Zisjordaniako Jenin hirian egindako sarekada batean. Beste hogei lagun inguru ere zauritu dituzte; horietatik lau, larri. Palestinako Osasun Ministerioaren datuak dira, eta Mai al-Kaila ministroaren arabera, egoera «oso kritikoa» pairatzen ari dira. Izan ere, esan du Israelgo militarrek «eragotzi» egin dietela anbulantziei Jeningo errefuxiatuen kanpamentuan sartzea. Era berean, salatu dute hiriko ospitaleko pediatria sailean negar gasa bota dutela.

Arratsaldeko erasoan, berriz, 22 urteko palestinar bat hil dute Israelgo indarrek, tiroz, Al-Ram hirian, Jerusalem ekialdean. Horrez gain, gutxienez bederatzi pertsona zauritu dituzte. Hala jakinarazi du Palestinako Osasun Ministerioak, WAFA berri agentziak jasotakoaren arabera.

Bestalde, Israelgo armadak azaldu du «eraso terrorista» bat eragozteko egin duela goizeko ekintza —han gutxi gorabehera 07:00ak zirenean jo du kanpamentuko alarmak—. Militarrek eta mugako poliziek parte hartu dute horretan. Hala, Herzi Halevi Israelgo Armadako buruak militarrei «prestakuntza indartu» dezatela agindu die, baita «terrorismoaren kontrako jarduerak aurrera eramaten» jarraitzeko ere. Anas Huwaixeh Jeningo berriemaileak Middle East Eye kazetari azaldu dionez, «Palestinako gudularien eta Israelgo soldaduen arteko tiroketa bat izan da, eta, gero, are indar gehiago sartu dira kanpamentuan»; «hamarnaka ibilgailu militar» bildu dira horren inguruan. Ekintza horretan, argindarra, Interneta eta estaldura ere moztu dizkiete errefuxiatuen kanpamentukoei.

Mahmud Abbas PAN Palestinako Aginte Nazionaleko presidenteak hiru eguneko dolua ezarri du bederatzi hilketengatik. Haren bozeramaile Nail Abu Rudeinehk «sarraski» gisa definitu ditu hilketak, eta «nazioarteko isiltasunaren itzalean» gertatu direla salatu. «Horrexek [isiltasunak] bultzatzen du gobernu okupatzailea gure herriaren aurka sarraskiak egitera, munduari begira», gehitu du.

Berdintsu, Mohamad Shtaye Palestinako lehen ministroak Israelgo indarren «exekuzioak» salatu ditu, eta NBE Nazio Batuen Erakundeari galdegin dio palestinarrei «babesa emateko lehenbailehen esku hartzea». Harekin bat egin du herrialdeko Atzerri ministroak, Riad Malkik: «erasoaldi odoltsu eta barbaroei» erantzuteko eskatu du. «Nazioarteko komunitateak eta AEBetako administrazioak [...] noiz egingo dute lan beren printzipio eta jarrerei eusteko, eta geratzen zaien sinesgarritasuna iraunarazteko?», erantsi du Malkik. NBEk, berriz, gertatutakoa gaitzetsi du, eta adierazi «ezinbestekoa» dela «tentsioak ahal bezain azkar apaltzea, eta jende gehiagok bizia gal dezan eragoztea».