Mondragonen industria arloa %15 handitu zen iaz, Ulma eta Orona aintzat hartu gabe

Mondragon taldea hasia da Ulmaren eta Oronaren irteeraren osteko aroa diseinatzen. Are gehiago, dagoeneko badaki iaz zer emaitza izan zituen, bi enpresa horien emaitzak kontuan hartu gabe: «Industria taldea %15 hazi zen 2021arekin alderatuta. Bi urteak alderatuta, eta Ulmaren eta Oronaren zenbakiak kontuan hartu gabe eginiko kalkulua da», zehaztu du Iñigo Uzinek, Mondragon taldeko presidenteak. Industria taldeak 4.800 milioi euroko fakturazioa izan zuen, eta azpisektore guztiak handitu ziren, «batzuk besteak baino gehiago».

«Taldea ondo dago, baita multzo industriala ere, eta salmenta zorroaren egoera ona da», laburbildu du Uzinek. Hilabete da Ulmak eta Oronak Mondragon taldea utzi zutela, eta presidenteak lasaitasun mezua bidali nahi izan du. «Gertakari aipaezina albo batera uzten badugu, berriz ere haziko gara. Gauzak gaizki badoaz, txakalaldiren bat izan dezakegu, baina hazten jarraitzen dugu». Lehengaien eta energiaren garestitzea nozitu zuten iaz, eta enpresa guztiek ezin izan zioten gehitu garestitze hori azken salmenta prezioari, baina taldea pozik agertu da emaitzekin. Era berean, nabarmendu du industria ekipamenduen eta makina-erremintaren sektoreak direla hobekien ibili zirenak.

Orain, Ulma eta Oronaren irteera gauzatzeko garaia da, eta Uzinek argi utzi nahi izan du prozesu hori bi enpresen ardura dela: «Guk ez dugu ia ezer kudeatu behar». Era berean, zehaztu du enpresek ez dutela zertan Lagun Arotik irten: «Guk ez dugu inor botatzeko ez asmorik, ezta ahalmenik ere». Gogoratu du aurretik taldetik irtendako beste enpresa batzuk Lagun Aron daudela oraindik ere. Irizar eta Amporen kasua da, hain zuzen.

Taldeko beste enpresei dagokienez, Laboral Kutxak urte ona izan zuen iaz, Eroskik «bilakaera positiboa» —urtarril amaieran ixten du urteko balantzea—, eta Unibertsitateek beren eskaintza zabaldu ahal izan zuten. «Oro har, urte ona izan da», laburbildu du. Uzinek Bihar adinekoen zerbitzu integrala ematen duen kooperatibaren aurkezpenean egin du iragarpena. Hura da Mondragonen barruan sortu den azken enpresa.

2023ari begira, «ziurgabetasun» giroa aipatu du, egoera oso epe motzean aldatzen delako. «Udazkenean hondamendia etorriko zela zirudien, sekulako atzeraldia, eta begira, ez da halakorik gertatu», nabarmendu du. Hala ere, zehaztu du aurtengo krisia ez dela pandemiaren ostekoaren modukoa. Pandemiak ez zien asko eragin Mondragon taldeko hainbat enpresari; oraingoan, berriz, eragina ez da hain uniformea: «Interes tasen igoera da eredu onena. Laboral Kutxari mesede egiten dio, baina agian autoa edo etxea erosteko gogoak uxatu ditzake, eta horrek beste sektore batzuei eragingo die».