politika
Odon Elorzak dimisioa eman du diputatu gisa
Donostiako alkate ohiak aitortu du PSOEko zuzendaritzarekin «desadostasunak» saihesteko hartu duela erabakia. 11 urte egin ditu Espainiako Kongresuan.
Odon Elorza PSE-EEko diputatuak dimisioa aurkeztu du, bere alderdiko zuzendaritzarekin «desadostasunik» ez izateko: «Nire ideiak jada ez dira erabilgarriak talde parlamentarioan». Maria Luisa Garcia Gurrutxagak ordezkatuko du karguan.
Espainiako Kongresuan 11 urte egin ditu Elorzak. Hogei urtez izan zen Donostiako alkate, eta 2011ko udal hauteskundeetan galdu zuen alkatetza. Urte hartatik zegoen Espainiako Kongresuan, Gipuzkoako diputatu gisa. Gaur, bere talde parlamentarioko kideei bidalitako gutun baten bidez eman du dimisioa aurkezteko erabakiaren berri. Elorzak nabarmendu du bere pausoa alderdiarekiko «leialtasun» ariketa bat dela, eta babesa azaldu dio «ezkerreko koalizioko gobernuari» eskuinaren aurrean.
Elorzak behin baino gehiagotan hautsi du PSOEk emandako boto irizpidea kongresuan; esaterako, 2021eko azaroan, ez zuen babestu Enrique Arnaldo Espainiako Auzitegi Konstituzionaleko magistratuaren izendapena. PSOEk bere araudian horrelako kasuetarako jasoa duen zigorrik handiena jarri zion: 600 euroko isuna.
Gainera, joan den udazkenean ere albiste izan zen Elorza, ezustean, bere burua Donostiako alkatetzarako hautagai gisa aurkeztuta PSE-EEren primarioetan. Kritiko azaldu zen EAJk eta PSE-EEk osatutako udal gobernuarekin; «batzuen autokonplazentziak» eta «besteen zalantzak» kezkatzen dutela esan zuen, eta azpimarratu Donostiak «lidergoa» behar duela. Primarioak Marisol Garmendiak irabazi zituen, militanteen botoen %66 eskuratuta, baina Elorzak adierazi zuen botoa «bideratzeko eta mediatizatzeko» estrategia bat egon zela, alderdiaren estatutuen kontrakoa dena, eta salaketa jarri zuen berme batzordean.
Dimisioa aurkeztuta, Gipuzkoako PSE-EEk eskerrak eman dizkio Elorzari bere jardun politiko eta instituzionalarengatik.
Haren ordezkoa, Garcia Gurrutxaga, Eskola Kontseiluko presidente ohia da, eta Donostiako Udalean zinegotzi izana. Otsailaren 7ko osoko bilkuran hartuko du diputatu akta.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
