Errusiak «arreta handiagoarekin» sendotuko du bere indar nuklearra

Errusiak «arreta handiagoarekin» sendotuko du lurreko, itsasoko eta aireko bere indar nuklearra. Hori jakinarazi du Vladimir Putin Kremlineko buruak gaur. Albistea heldu da, hain zuzen, AEBekin arma nuklearren kontrolerako duen itun bakarra behin-behinean eten duela aditzera eman eta bi egunera —Mendebaldeko herrialdeek eta NATO Ipar Atlantikoko Itunaren Erakundeak aho batez kritikatu zuten erabakia—. Aberriaren Defendatzailearen Egunaren harira grabatu duen bideoan nabarmendu du, bide batez, aurten hedatuko dituela kontinente arteko RS-28 Sarmat misilak, Mendebaldeko armadek Satan 2 deitutakoak. Errusiaren inbasioak urtebete egin bezperan heldu da iragarpena.

Moskuk dozena erdi bat urte daramatza misil hori garatzen. 35 metroko luzera du, eta azken urteotan adituek azaldu dutenez, 18.000 bat kilometroko irismena du eta hainbat buru nuklear jaurtitzeko gai da. Iazko apirilean frogatu egin zutela eta 6.000 kilometroko bidea egin zuela adierazi zuen Errusiak. Zientzialari Estatubatuarren Federazioak iazko azaroan kaleratutako datuek diotenez, Errusia da buru nuklear gehien dituen herrialdea: ia 6.000.

Putinen esanetan, «armada eta flota moderno zein eraginkorrak» edukitzea «segurtasun berme bat» da, eta horregatik agindu du jarraituko dutela Kinzhal misil hipersonikoak eta Zircon itsaspeko nuklearrak «modu masiboan» produzitzen. «Gure defentsaren sendotasuna lehenesten segituko dugu».

Ikusi gehiago: Errusiak eten egin du arma nuklearrak kontrolatzeko AEBekin zuen ituna

2010ean Washingtonekin sinatutako START Berria akordioa uztearen ondorioez ohartarazi du Kremlinek azkeneko hiru egunetan, eta aintzat hartu behar da, bestetik, AEBak eta NATO ari direla esaten Txina aztertzen ari dela Errusiari laguntza militarra ematea. Hori erakusteko frogak dituela esan zuen Antony Blinken AEBetako Estatu idazkariak aurreko asteburuan, Municheko Segurtasun Konferentzian (Alemania), eta Jens Stoltenberg Mendebaldeko aliantza militarreko idazkari nagusiak adierazi zion, atzo, Associated Press berri agentziari, jarrera horren berri ematen duten «zantzuak» dituztela.

Eta identifikatu gabeko AEBetako iturri ofizialak aipatuz The Wall Street Journal egunkariak gaur kaleratu duenez, AEBetako Gobernua eztabaidatzen ari da Txinak Errusiari egindako balizko arma transferentziari buruzko inteligentzia zerbitzuen informazio bat argitaratu ala ez. AEBetako egunkari horrek jaso duenez, aliatuek «ohartarazpen formal bat» egin zioten Wang Yi Txinako Kanpo Aferetarako Batzorde Zentralaren zuzendariari, Munichen.

Ikusi gehiago: Txinak iragarri du bake egitasmo bat aurkeztuko duela Ukrainarako

Iturri gisa baliatutako funtzionarioek esan dutenez, Txinak ez du, oraindik, auziari buruzko erabakirik hartu. Hori bai, Pekinek bake egitasmo bat aurkeztuko duela iragarri zuen Txinaren diplomazialari gorenak, joan den asteburuan, Munichen. Azken astean Europan izan da, bilerak egin ditu Italiako, Hungariako eta Alemaniako gobernuetako agintariekin, baita Putinekin ere, atzo. Errusiako Atzerri Ministerioko bozeramaile Maria Zakharovak «aldatu ez den jarrera orekatua» eskertu zion Yiri. Inbasioa hasi zenetik, Txinak azpimarratu izan du herrialde guztien lurralde bateratasuna errespetatu behar dela, baina nabarmendu du, aldi berean, herrialde guztien «kezka legitimoei» erreparatu behar zaiela. Errusia eta Txina aliatu geopolitikoak dira.

Aurreko larunbatean Txinako diplomaziaburuak Munichen aurreratu zuenez, Xi Jinping Txinako presidenteak bihar da, inbasioaren lehen urteurrenean, bake egitasmoa aurkeztekoa. Horrekin lotuta, Volodimir Zelenski Ukrainako presidenteak gaur esan die kazetariei ez duela Pekinen bake egitasmoaren berri, eta Txinako agintariekin biltzea gustatuko litzaiokeela.