Ikus-entzunezkoak
Torturaren inguruko 'Karpeta urdinak' dokumentalak publikoaren saria irabazi du Documenta Madrid jaialdian
Ander Iriarte zuzendariak eskerrak eman dizkie Madrilgo ikusleei, ikus-entzunezkoak izan duen harreragatik: «Milaka eta milaka torturaturi esan diezue sinisten diezuela».
«Bake prozesuan gauden honetan, bestearen mina aitortzeko lekua utzi behar da. Ez dakit lehen aldia den, baina Madrilgo ikusleek —eta hori, sinbolikoki, asko da— milaka eta milaka torturaturi esan diezue mina aitortzen diezuela, sinisten diezuela. Eta hori oso garrantzitsua da, eskerrik asko». Ander Iriarte zinemagileak (Oiartzun, Gipuzkoa, 1986) horrela amaitu du Documenta Madrid jaialdiko sari banaketan eman duen hitzaldia. Publikoaren saria jaso du Iriartek zuzendu eta ekoitzitako Karpeta urdinak dokumentalak.
Premio del publico en @DocumentaMadrid
— karpetaurdinak (@karpetaurdinak) May 8, 2023
Porque no existe nada más doloroso, que tras ser golpeado, humillado y vejado... Contarlo y que te acusen de mentir.
¡Gracias Madrid, por decir a los torturados, -Si os creemos!@zineuskadi@Zinea_eus @Gastibeltzafilm @EgiariZor pic.twitter.com/sdVP8nSmrF
Torturaren inguruko dokumental horrek 113 minutu irauten du, eta Pako Etxeberriak Eusko Jaurlaritzarentzat zuzendu zuen txostenean dago oinarrituta. Joan den irailean estreinatu zuten, Donostiako Zinemaldian. Lana Mirokutanarekin ekoitzi zuen Iriartek, Gastibeltza Filmak-ekin batera.
Estreinaldiaren egunean BERRIAri azaldu zionez, «konbentzituak ez daudenek begiak irekitzea» zen bere nahia, eta Madrilen eman duen hitzaldian ere horretan egin du azpimarra. Dokumentala egiteko ehun protokolo baino gehiago irakurri eta ikusi zituen. Zuzenean ez zuen torturaturik elkarrizketatu, baina ikerketaren material originala erabili zuten: «Elkarrizketa horiek psikologoek, psikiatrek, antropologoek eta auzi medikuek egin dituzte», azaldu zuen.
Iriarteren aita torturatua izan zen, eta ageri da ikus-entzunezkoan. Besteak beste, Ertzaintzako agenteek egindako torturak ere aipatzen dira.
Documenta Madridekoa ez da Karpeta urdinak lanak jaso duen lehen aitortza. Azken hilabeteetan, nazioarteko hainbat jaialditan ikusi ahal izan da dokumentala, eta jardun hori herriz herriko emanaldiekin uztartzen dabiltza ekoizleak. Hurrengo emanaldiak Zornotzan (Bizkaia), Valentzian (Herrialde Katalanak) eta Azpeitian (Gipuzkoa) izango dira.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
