Laudioko, Amurrioko, Orozkoko eta Aiarako lurretan parke eoliko bi egiteko eskaera egin du Ferosca Wind SL enpresak. Astelehenean argitaratu zen EAEko aldizkari ofizialean, eta, ordutik, 20 eguneko epea zabaldu da helegiteak ipintzeko. Epe horretan, pertsona fisiko eta juridikoak aurkez daitezke baldin eta asmoa badute eremu horretan proiekturen bat aurrera ateratzeko.
27 megawatteko potentzia gordineko hamabi haize errota ipini nahi dituzte: sei parke bakoitzean. Ferosca I eta Ferosca II izango dute izena parkeek, eta 2.000 hektareatik gora erabiliko dituzte horietarako.
Alea-k eta Aiaraldea.eus-ek argitaratu dutenez, Aiaraldeko Mendiak Bizirik plataformak salatu du Arabako Foru Aldundiak hauteskundeen ostera arte itxaron duela proiektuaren berri emateko, «kanpainan ez esateko». «Ez guk ez udalek ez dakigu ezer, eta hogei egun baino ez daude helegiteak aurkezteko», salatu dutenez, eta herritarrek eta udalek halako erabakietan eragiteko ahalmen urria daukatela adierazi dute.