Albistea entzun

EHAK ere legez kanpo utzi du Auzitegi Gorenak

EHAK legez kanporatzea erabaki du Espainiako Auzitegi Gorenak. Atzo hasi ziren epaileak defentsaren alegazioak aztertzen eta gaur jakinarazi dute erabakia. Auzitegiek herenegun EAE-ANV utzi zuten legez kanpo, eta atzo Amnistiaren Aldeko Batzordeak eta Askatasuna.

Berria -

2008ko irailak 18 20:30
Espainiako Auzitegi Gorenak herenegun EAE-ANV legez kanpo utzi zuen, atzo Auzitegi Nazionalak utzi zituen hala Amnistiaren Aldeko Batzordeak eta Askatasuna, eta gaur berriro Gorenaren txanda izan da: EHAK utzi du Espainiako legetik kanpo. Beste erakunde haiekin egin bezala, EHAK desegiteko eta alderdi politiko haren ondasun denak likidatzeko agindua eman du. “Erakunde terrorista” delako legez kanporatu du Auzitegi Gorenak EHAK. Irailean egin zuten auzi saioa, eta epaia gaur eman dute epaileek. Atzo hasi ziren alderdi politiko haren defentsaren alegazioak aztertzen. ANVren kasuan gertatu bezala, beraz, nahikoa izan dute egun bat ondorioa plazaratzeko. Legez kanporatzea gaur heldu den arren, Baltasar Garzon Auzitegi Nazionaleko epaileak aurtengo otsailaren 8an EHAKren -eta ANVren- jarduera politiko denak eten zituen. EHAK behin izan da hauteskundeetan: 2005eko apirilaren 17an, Arabako, Bizkaiko eta Gipuzkoako bozetan. Espainiako Justiziak Batasuna legez kanporatu eta Aukera Guztiak baliogabetu ondoren parte hartzea erabaki zuen EHAK-k, “hauteslego ezkertiar eta abertzaleari aukera ematearren”, eta bederatzi legebiltzarkide eta 150.644 boto lortu zituen. Laugarren indarra izan zen. Juan Jose Ibarretxek (EAJ) hari esker lortu zuen hirugarrenez Eusko Jaurlaritzako lehendakari izatea. Izan ere, bozketan 34 boto bildu zituen (EAJ 22ak, EAko zazpiak, EBko hirurak eta EHAK-ko bi) eta Patxi Lopez PSE-EEko hautagaiak 33 (PSE-EEko 18ak eta PPko 15ak). EAEko bozen ondoren EHAK-k Ezker Abertzalea (EAB) izena hartu zuen legealdirako.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna