Gizartea

Zikloiak eragozpen handiak sortu ditu, baina kalte pertsonal larririk ez

Haizeak gehienez 167 kilometro orduko abiada hartu du, baina denboralea bukatzen ari da. Milaka euskal herritar argindarrik gabe daude. Eibarren Ipurua kiroldegiko teilatuaren zati bat jausi da, eta gaur Nastic-Eibar futbol partida ez dute jokatuko.
Ekaitza Donostian, gaur goizean. Apenas ikusten zen ezer.
Ekaitza Donostian, gaur goizean. Apenas ikusten zen ezer. / Irutxuloko Hitza

Berria -

2009ko urtarrilak 24
Etorri da zikloia Euskal Herrira eta, espero bezala, eragozpen handiak sortu ditu baina orain arte kalte pertsonal larririk ez. EAEko SOS Deiak-ek esan du 4.300 dei hartu dituztela atzo gauerditik gaur eguerdira arte, eta 1.200 irteera egin dituzte. Lapurdin, Nafarroa Beherean eta Zuberoan suhiltzaileek 300 bat irteera egin dituzte. Haizeak 167 kilometro orduko abiada hartu du gehienez: Balmasedan, Garbea mendian. 160koa Jaizkibel mendian, 158koa Oiz mendian, 150ekoa Lapurdiko kostan, 155ekoa Bilboko portuan, 115ekoa Gasteizen... Eusko Jaurlaritzak eguerdian jakinarazi du zikloia bukatzen ari dela. Arazorik handienak kostaldean izango dira, olatuengatik. Jaurlaritzak emergentzi planarekin segituko du. 17:30ak arte 250.000 euskal herritar inguru argindarrik gabe egon dira, edo arazo handiekin. Izan ere, 300 bat herritan izan dute arazo hori: Bilbo, Alonsotegi, Mungia, Lekeitio, Ondarroa, Amurrio, Beasain, Bergara, Tolosa, Deba, Elgoibar, Hondarribia, Donostia, Iparraldeko kostaldean... Iberdrolak jakinarazi du Araban, Bizkaian eta Gipuzkoan 17:30etik 44.000 herritar daudela argindarrik gabe: Artzeniega, Amurrio, Deba, Lekeitio, Bakio, Sopuerta eta Busturialdean. Basaurin 60 lagun etxetik atera dituzte, Sarratua auzoan, haizeak teilatua eraman egin duelako. Balmasedan bi baserritako jendearekin egin dute gauza bera, eta Donibane Lohizunen eraikin bateko 30 lagunekin. Horretaz gain, haizeak nonahi bota ditu hesiak, semaforoak, zuhaitz txikiak... Eibarren Ipurua kiroldegiko teilatuaren zati bat erori egin da, eta Arrate-Portland eskubaloiko lagunarteko partida -han ziren jokatzekoak, gaur- Elgoibarren jokatu beharko dute. Arratsaldean jakin denez, Nastic-Eibar Espainiako Bigarren A Mailako partida ez dute jokatuko -18:30ean zen hastekoa, Tarragonan (Herrialde Katalanak)-, haizeagatik. Hegazkin bidaiei dagokionez, 25 bertan behera utzi dituzte Loiun (gehien han: 19), Noain eta Hondarribian, eta Miarritzeko aireportua itxita egon da. Euskotrenek Zarautz-Zumaia zerbitzua etenda izan du 15:00ak arte. Zornotza-Bermeo oraindik etenda du; autobusak jarri ditu. Akitania eskualde osoan trenik ez dabil. Errepideetan, A8 itxita izan dute Donostian Bilborako noranzkoan, zuhaitz bat erori delako, eta kamioiei debekatu egin diete Biriatutik pasatzea Baiona aldera. Zarautz-Zumaia bidea itxita dago, olatu arriskuagatik, eta Subijana-Izarra ere bai, harriak-eta erori baitira. Bigarren mailako beste errepideetan garbiketa lanetan dabiltza. Bilboko Metroa 6:30etik 12:00ak arte etenda izan da, haizeagatik. Olatuak Matxitxakon 21,5 metroko altuerakoak izan dira. Donostian hamalau metro harrapatu dituzte, Pasaian ia hamar...

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna