Albistea entzun

'Egunkaria auzia'

'Egunkaria'-ren auzibidea ixteko eskatu dute hainbat eragilek berriro

Egunkariaren Aldeko Taldeak deituta, elkarretaratzea egin dute eguerdian Andoainen, Martin Ugalde Kultur Parkean, euskarazko kazetaren itxieraren seigarren urteurrenean.
'Egunkaria auziko' auzipetuetako batzuk, gaur, Andoaingo elkarretaratzean.
'Egunkaria auziko' auzipetuetako batzuk, gaur, Andoaingo elkarretaratzean. BERRIA.INFO

Berria -

2009ko otsailak 20
Gaur sei urte itxi zuen Espainiako Auzitegi Nazionalaren aginduz Guardia Zibilak =iEuskaldunon Egunkaria=i, eta gaur berriro elkartu dira Andoainen (Gipuzkoa), Martin Ugalde Kultur Parkean -han zegoen =iEgunkaria=i-ren egoitza- hainbat eragile, auzibidea ixteko eskatuz. Hamabietatik aurrera =iEgunkaria libre!=i lelopean batu dira berrehun bat lagun, Egunkariaren Aldeko Taldeak deituta. "Gertaera bereziak, larrienak izanik ere, herri honetan zeremonia sozial arruntez oroitzera ohitzen ari gara. Gainera, hain dira ugari gure herrian gertatu ohi diren gehiegikeria politikoak ezen gehiegikeria bakoitza galduta gelditzen baita auzoan gertatzen denarekin. Gehiegikeria horiek banan banan aipatzen hasiko bagina errosario luzea osatuko genuke", esan du talde haren izenean Joan Mari Torrealdai auzipetuak. Auzia ixteko eskatu du, eta une hauetan epaiketara bidean daudela gogoratu du. "Ingurura begira jartzen gara, adierazleren bat bilatu nahian, eta aurkitzen ditugunak ez dira onak. Ilegalizazio gehiago, 18/98koak bezalakoak kartzelan, antzerako akusazio oinarriekin diren beste batzuk ere barruan... Ez, ez dira adierazle onak. Ez dugu aurkitzen baikor izateko zantzurik". Baina ez dute etsiko, Torrealdaik azpimarratu duenez, eta "kontzientzia kritikoa" izatea garrantzitsua dela adierazi du. "Zuengana helarazi nahi dugun deia hauxe da: eska dezazuela behin eta berriz sobreseimendua, =iEgunkaria=i kasuaren artxiboa, epaiketarik ez!. Zuen aurretik beste askok egin duten bezala: Gure Babes Taldeak hasteko, eta gero, Europako Parlamentuko hainbat parlamentarik, Eusko Legebiltzarrak, Batzar Nagusiek, Eusko Jaurlaritzak hiruzpalau bider, Espainiako Erresumako Gorteetako 61 diputatu eta senatorek. Fiskalak berak ere ez du akusatzen". =bOrdezkaritza zabala Martin Ugalde Kultur Parkean=b Gaurko elkarretaratzean izan dira, besteak beste, Markel Olano Gipuzkoako ahaldun nagusia (EAJko kidea), Maria Jesus Aranburu Gipuzkoako Euskara diputatua (EAJ), Arnaldo Otegi eta Tasio Erkizia (ezker abertzalea), Xabier Mikel Errekondo (Usurbilgo alkatea, ezker abertzalea), Marian Beitialarraingoitia (Hernaniko alkatea, ezker abertzalea), Onintza Lasa (EAko zuzendaritzakidea), Jon Abril (Aralarreko koordinatzaileordea), Rebeka Ubera (Aralarreko batzarkidea Gipuzkoa), Mikel Izagirre (EBko kidea eta Urnietako alkatea), Antton Karrera (EB), Patxi Agirrezabala (ELAko Komunikazio arduraduna) eta Rafa Diez (LABeko idazkari nagusi ohia). Politikari eta sindikalistez gain, Joxean Lizarribar (EKTko administrazio kontseiluko lehendakaria) ere izan da, Joanmari Larrarte (EKTko kontseilari ordezkaria), Pello Zabala (EKTko administrazio kontseiluko kidea), Iñaki Murua (Euskal Herriko Bertsozale Elkarteko lehendakaria), Koldo Tellitu (Euskal Herriko Ikastolen Konfederazioko lehendakaria), Xabier Mendiguren (Kontseiluko idazkari nagusia), Joan Mari Irigoien (idazlea), Mariano Ferrer (kazetaria), Xabier Letona (=iArgia=i astekariko zuzendaria), Antton Olariaga (marrazkilaria), Mattin (marrazkilaria), Iñaki Zabaleta (EHUko irakalea), Mattin Troitiño (Senideak), Martxel Toledo (Esait)... =bBi auzi daude irekita=b 2003ko otsailaren 20an Juan del Olmo Auzitegi Nazionaleko epailearen aginduz, =iEgunkaria=i-ko egoitzak itxi eta hamar lagun atxilotu zituzten: Xabier Alegria, Luis Goia (2006an hil zen), Joan Mari Torrealdai, Pello Zubiria, Martxelo Otamendi, Xabier Oleaga, Iñaki Uria, Fermin Lazkano, Txema Auzmendi eta Inma Gomila. Uriak, Oleagak, Otamendik, Alegriak eta Auzmendik torturak eta tratu txarrak jaso zituztela salatu zuten epailearen aurrean. Guztiek jarri zuten salaketa, eta guztiak artxibatuta daude. Bi auzi daude: =iEgunkaria=i-ren itxiera ekarri zuen sumario nagusia batetik, eta auzi ekonomikoa, bestetik. Lehen kasuan akusatuta daudenei, =iEgunkaria=i-n "izandako ardurengatik", ETAko kide izatea egotzi diete. 12 eta 14 urte bitarteko espetxe zigorrak eskatu dituzte haien aurka. 2006an fiskalak auzia artxibatzeko eskaera egin zuen, auzipetuei zer leporatu ez zegoela argudiatuz, baina =iEgunkaria auzia=i-k aurrera egin du AVT eta Dignidad y Justicia elkarteek herri akusazio gisa eginiko eskaera dela-eta. Herri akusazioaren eskaerekin bakarrik, fiskalaren zein akusazio partikularren eskaerarik gabe, epaiketa egitea legezkoa den argitu gabe dago. Auzi ekonomikoan, aldiz, diru kontuak faltsutzea eta zerga iruzurra egin izana egotzi diete zortzi akusatuei, eta hori "delitu terroristarekin" lotu dute. Auzitegi Nazionalean dago horrenbestez auzi hori ere.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Gurutze Gorria

Aukera berberak izateko eskubidea

Mikel Garcia Martikorena - Bizkaiko Hitza

Bizkaian hamar adingabetik bat pobre bizi da, eta hamarretik biri ongizatea falta zaie. Halako zaurgarritasun egoerei erantzun eta umeei aukera berriak eskaintzeko, zenbait egitasmo dituzte, Bizkaiko Foru Aldundiak ez ezik, Save The Childrenek eta Gurutze Gorriak.

 ©Juan Carlos Ruiz / Foku

Hizkuntzak duen zama

Itsaso Jauregi - Nafarroako Hitza

Nafarroako Gobernuak ‘Migrazioak eta kultur aniztasuna’ izenburuko komunikazio gida aurkeztu du, hedabideei migratzaileen inguruan hitz egiteko gomendioak eskaintzeko.

Sololuzeri eta Beltrani egindako omenaldia, gaur, Zaldibarko Eitzaga auzoan. ©Aritz Loiola / Foku

Alberto Sololuze eta Joaquin Beltran omendu dituzte, eta gertatutakoa argitzeko eskatu

Paulo Ostolaza

Bihar beteko dira hiru urte Zaldibarko luizitik. Han hildako bi beharginei omenaldia egin die Zaldibar Argitu plataformak.

 ©BERRIA

BERRASMATU BEHARREKO SISTEMA

Arantxa Iraola - Garazi Aduriz

Erruz ugaritzen ari dira osasun sistema publikoan dauden arazoei buruzko berriak; izurriak zamatu egin du aurrez ere usu herren ari zen lan eredua. Populazioa zahartzen ari den neurrian, premia handitzen ari da, eta sistema berriz asmatzeko garaia da, sare publikoak sendo iraun dezan, pribatuaren itzal gero eta luzeagoaren aurrean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.