politika

EAk eta ezker abertzaleak itun estrategikoa sinatu dute, euskal estatuaren bila

"Bide zibil, politiko eta demokratikoak erabiltzeko behin betiko konpromiso irmoa" dutela azpimarratu dute. Bilbon izan da ekitaldia, Euskalduna jauregian.

Berria -

2010eko ekainak 20
EAk eta ezker abertzaleak elkarlanerako akordio estrategikoa sinatu dute gaur Bilbon, Euskalduna jauregian, euskal estatu independentea lortzeko helburuarekin. "Bide zibil, politiko eta demokratikoak erabiltzeko behin betiko konpromiso irmoa" dutela azpimarratu dute indar politiko biek. Ituna Euskal Herri osoari begira egindakoa da, herrialde guztien berezitasunak kontuan hartuta. "Gaurko marko juridiko-politikoak agortuta" daudela esan dute EAk eta ezker abertzaleak eta "fase berri hau" herritarrekin eta eragileekin egiteko apustua dutela, independentisten indar metaketaren beharra eta hauteskundeetan lankidetzan jarduteko aukera aipatuz. "Herri mobilizazioaren" garrantzia ere jaso dute itunean, eta "ausardiaz jokatzeko garaia" dela uste dute. "Euskal estatua da aukerarik onuragarriena herritarrentzat". Euskal estatua eskuratu aurretik "marko demokratikoa" behar da, EAren eta ezker abertzalearen ustez, "aukera denek berdintasunean" jokatzeko. Espainiako eta Frantziako estatuen "jarrera antidemokratikoa" salatu dute akordioan. Gatazka eta "indarkeria politikoa" gainditzeko tresnak elkarrizketa, negoziazioa eta akordioa direla nabarmendu dute, eta =iMitchell printzipioak=i gauzatu behar direla -"indarra erabiltzeari uko egiteko konpromisoa" izan behar dela, besteak beste-. Aipatutakoaz gain, gizarte arlo guztietan gutxieneko adostasun puntu batzuk jaso ditu akordioak; adibidez, garapen iraunkorrari buruz, edo euskara, hezkuntza eta parekidetasunari buruz. Lehentasunezko arlo edo gai horietan elkarlanean aritzeko irizpide batzuk finkatu dituzte bi indar abertzaleek. EAtik Pello Urizar idazkari nagusia, Koldo Amezketa, Santi Merino, Ikerne Badiola, Mariano Alava eta Maider Carrerek sinatu dute akordioa, eta ezker abertzaletik Rufi Etxeberria, Jone Goirizelaia, Txelui Moreno, Idoia Aiastui, Karmele Aierbe eta Iñaki Olaldek. "Arduraz eta ilusioz egin dugu apustu hau", esan dute akordioaren testua irakurri duten bi lagunek (EAko Elisa Sainz de Murietak eta ezker abertzaleko Miren Legorburuk). "Baina apustu hau ez da inoren kontrakoa, ez dugu harresirik nahi". =b12:10: EAko eta ezker abertzaleko ordezkari nagusiak aretora.=b 12:10etan sartu dira aretoan EAko eta ezker abertzaleko ordezkari nagtusiak: EAtik, kasu, Pello Urizar idazkari nagusia, Ikerne Badiola, Koldo Amezketa eta Santi Merino, ezker abertzaletik Rufi Etxeberria, Txelui Moreno, Karmele Aierbe eta Jone Goirizelaia. =b12:25: Nazioarteko ordezkarien ustez, "erabaki ausarta" da eta "ekitaldi historikoa".=b Nazioarteko hainbat ordezkari egon dira Euskaldunan eta, haien arabera, gaurko ekitaldia "historikoa" da, eta "pozik eta harro" daude bertan izateagatik. "EAk eta ezker abertzaleak estrategia bateratua adostea erabaki dute eta horregatik da historikoa da ekitaldi hau. Urrats garrantzitsua da". Nazioartean elkartasuna landu beharra dagoela iritzi diote. "Zuekin batera lanean segituko dugu, bake prozesua bideragarria izateko". Irlandako Sinn Fein, Flandriako N-VA, Salvadorreko FMLN, Palestinako FPLP, Europako Parlamentuko ALE talde parlamentarioko ordezkariak -lehendakariordea barne-, Kataluniako ERC, CUP eta Endavant taldeak, Galiziako BNG, NOS-UP eta FPG, Aragoiko BIC, Corriente Roja elkartea eta Gaztelako IZCA izan dira Euskaldunan. =b12:45: Bideoan irudi esanguratsuak.=b Nazioarteko hiru kideren hitzaldien ostean, bideoa bota dute, une eta irudi esanguratsuekin: Jose Antonio Agirre eta Telesforo Monzon, Carlos Garaikoetxea Jaurlaritzan, intsumisioa, presoak, Ahotsak, euskal gehiengo sindikala, Lizarra-Garazi, Arnaldo Otegi, Gaztherria, AHTaren aurkako mobilizazioak, azken Aberri Eguna... =b12:53: "Atzerapenik izan ez dezan sortu den itxaropenak", bertso baten bukaera.=b Bideoaren ondoren, bertsolarien saioa hasi da: Sustrai Colina, Miren Amuriza eta Aitor Sarriegi kantuan. Indar metaketaren eta euskal estatuaren aldarria egin dute, eta "atzerapenik izan ez dezan sortu den itxaropenak" esanez bukatu du Amurizak azkeneko bertsoa. =b13:00: EAko eta ezker abertzaleko kide historiko eta ezagunen babesa.=b Sabin Intxaurraga, Tontxu Campos edota Nestor Basterretxea EAko kide historiko eta ezagunak igo dira oholtzara, eta Xabier Zubizarreta, Iñaki Antiguedad edota Inaxio Agirre ezker abertzaletik. Intxaurraga Jaurlaritzako kontseilari ohiak esan du "bide zibil, politiko eta demokratikoen aldeko apustua" dela gaur bi alderdiek sinatuko duten akordioa, eta "estrategia bateratua" gauzatu nahi dutela. Hori lortuz gero, beste eragile asko batuko direla uste duela adierazi du EAko kideak. Zubizarretak azpimarratu du "indarrak biltzeko garaia" dela eta independentziaren bideari heldu behar zaioa. "Nazio zahar hau berrizta dezagun, eta hori euskal estatuarekin lor daiteke". "Aurrera bolie" esanez amaitu du Zubizarreta Arrasateko alkate izandakoak bere hitzaldia. Basterretxea eskulturgileak "kultura zaintzeko" dei egin die politikariei, baita Ipar Euskal Herriko jendearekin lan handiagoa egiteko ere. =b13:20: Gizarte eragileen aldarrikapenak.=b Gizarte eragile batzuk ere izan dira oholtzan, eta hezkuntza sistema propioa aldarrikatu dute, Euskal Herriaren euskalduntzea, euskararen ofizialtasun osoa, laborantzaren garrantzia, beste nekazaritza eredu bat, Euskal Herriko "egitura instituzionala nahasia eta zaharkitua" dela aipatu dute, jendarte parekidea behar dela, euskal langileen gehiengoa kontuan hartzeko dei egin dute, ingurumena babesteko eta Euskal Herria ez eraikitzeko "zementuaren gainean". Bukaeran, ezker abertzaleko eta EAko gazteen ordezkariak igo dira oholtzara. =b13:40: Akordioa irakurtzen hasi dira.=b EAren eta ezker abertzalearen hitzarmena irakurtzen hasi dira Elisa Sainz de Murieta (EA) eta Miren Legorburu (ezker abertzalea). =lGaur BERRIAk==http://paperekoa.berria.info/harian/2010-06-20/008/002/euskal_estatua_xede_itun_estrategikoa_sinatuko_dute_eak_eta_ezker_abertzaleak_adostutako_oinarriak_bide_politiko_baketsu_eta_demokratiko_hutsak_erabiltzeko_konpromisotik_haratago_doaz_akordioa_nazionala_izango_da_euskal_herri_osoa_baita_hura_aplikatzeko_eremua.htm=l aurreratu ditu akordio testuko ardatz nagusiak. Hogei minutuz aritu dira leitzen testua. =b14:10: Ituna sinatu dute seina ordezkarik.=b EAtik eta ezker abertzaletik seina ordezkarik sinatu dute ituna. Aurresku batekin amaitu da ekitaldia, 14:20etan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna