Albistea entzun

EUSKAL HERRIA

Loiolako basilika beteta, eta ataria ere bai

Urteroko prozesioa egin dute gaur Loiolako basilikara. Kanpoan, Etxeratek deitutako elkarretaratzeak jende asko bildu du.

Ertzaintzak gertutik zaindu du presoen aldeko elkarretaratzea (2011-08-01)

Berria -

2011ko abuztuak 1

Gaurko egunez Loiolako basilikara egin ohi duten prozesioak aurpegi ezagunak bildu ditu aurten ere; besteak beste, bertan izan dira Isabel Zelaa hezkuntza sailburua, Eneko Etxeberria alkatea eta Martin Garitano Gipuzkoako diputatu nagusia. Azken bi hauek ez dira basilikara sartu.

Atarian, urteroko legez, Etxerat plataformak deitutako elkarretaratzea egin dute, eta jende asko bildu da. Eneko Etxeberria alkateak eta Garitano ahaldun nagusik nahiago izan dute kanpoan geratu, eta atarian elkartuta zeudekin bat egin. Elkarretaratzean zeudenek txaloka hartu dituzte euren artean.

Eliza barruan gainerakoak mezan zeuden bitartean, Etxeraten izenean Izaskun Abaigarrek testu bat irakurri du,  "Parot doktrina" kendu behar dela eskatu du; presoen eskubideak aldarrikatuz. Eskubide urraketa horiek salatuz hain zuzen, asteburu honetan senideak bisitatzera joanda gertatu den istripua hartu du gogoan, eta "erruleta errusiar hau" bukatu egin behar dela azpimarratu du.

Garitanok ere hartu du hitz batzuk esateko tartea, eta sufrimenduak amaierarik ez duela gogorarazi du. Etxeratekoek bezalaxe senideak ekarri ditu hizpidera, eta gero "bizi osorako espetxe zigorra" bertan behera uzteko eskatu du, "gaixo dauden presoak" kaleratu ditzaten. Argi adierazi du bere nahia: "Garai berrietan egon arren, sektore zabal bat legez kanpo dago oraindik, eta horrek amaitu egin behar du".

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.