Gipuzkoako Foru Aldundia ez da datorren astelehenean Donostian Basque Culinary Centerren inaugurazioan izango, Espainiako printze-printzesak izango direlako ekitaldian eta haiek "herri honen ukazioaren sinbolo" direlako, Larraitz Ugarte foru gobernuko bozeramaileak gaur esan duenez.
Diputatuen Kontseiluak hartu du ekitaldira ez joateko erabakia, gaur. "Gipuzkoar asko minduta sentituko lirateke Diputazioak inaugurazio horretan Espainiako printze-printzesekin batera parte hartuko balu. Zoritxarrez, ez gara joango", adierazi du Ugartek.
Atzo Martin Garitano ahaldun nagusiak Radio Euskadin zioen ongi-etorria egingo liokeela Espainiako printzeari, "borondate eta errespetuarekin baletor". Gaur Ugartek esan du Garitanoren hitzak "intentzio txarrez manipulatu" zituztela atzo.
Aldundiak Basque Culinary Center babesten duela azaldu du bozeramaileak, "herri honentzat zentro estrategikoa baita". Admininistrazio Kontseiluko kidea da Diputazioa, eta Ugartek argitu du Espainiako errege etxeari aurreko kontseiluak egin ziola inauguraziora etortzeko gonbitea.
Legealdi honetan Bildu dago Gipuzkoako foru gobernuan. Aurrekoan, EAJ eta Hamaikabat.
