Albistea entzun

ETA-ren agiria

ETAk ontzat eman du Nazioarteko Egiaztatze Batzordearen sorrera

BERRIA egunkarira bidalitako oharrean ETAk berehala eman dio ongietorria Egiaztatze Batzordeari. Agiria bihar kaleratuko du BERRIAk, osorik.

Berria -

2011ko urriak 1

ETAk agurtu egin du Nazioarteko Egiaztatze Batzordearen sorrera, BERRIA egunkarira igorritako agiri baten bidez. ETAk “ontzat” eman du aurkeztu berri den Egiaztatze Batzordea. BERRIAk bihar kaleratuko du osorik ETAren agiria.

Nazioarteko Egiaztatze Batzordea joan den asteazkenean aurkeztu zuten, Bilbon, eta bere eginkizuna ETAk joan den urtarrilaren 10ean iragarritako su-eten iraunkor eta orokorra egiaztatzea da. Nazioarteko bost adituk osatzen dute batzordea: Ram Manikkalingam, Ray Kendall, Cris Maccabe, Ronni Kasrils eta Satish Nambiar. Taldearen koordinatzailea Fleur Ravensbergen herbeheretarra da, Manikkalingam zuzendari den Herbereetako Elkarrizketarako Aholkularitza Taldeko kidea. ETAk berehala eman dio ongietorria Egiaztatze Batzordeari.

ETAk su-etena iragarri zuenean, nazioarteak egiaztatzeko modukoa zela argitu zuen, Gernikako Akordioaren eskaerari jarraikiz. Halaber, joan den martxoaren 27an kaleratutako agirian, ETA prest azaldu zen “egiaztatze informal bat onartzeko”, Frantzia eta Espainiako aitortza ofizialik ez izan arren. Hori guztia gogorarazi du bihar kaleratuko den agirian, eta, bide batez, kexu azaldu da Espainia eta Frantziako estatuek denbora honetan erakutsitako jarrerarekin.
 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...