Bakearen alde beti "kiskali" dela erantzun dio Lopezek Egigureni

PSE-EEko presidentea oso kritiko agertu da elkarrizketa batean Espainiako Gobernuarekin eta Eusko Jaurlaritzarekin. Bakearen bandera Bilduk duela dio eta horrek "tsunami abertzalea" eragingo duela. "Isildu beharra izan dut lehendakariari kontra ez egitearren", azaldu du. Ezker abertzaleak "muga" zeharkatu duela dio, eta ez duela ulertzen zergatik dagoen Arnaldo Otegi espetxean. Presoen hurbilketa defendatu du: "ETA presoak dira, eta presoak dauden bitartean, ETA dago".

Berria -

2011ko urriak 19

Patxi Lopezek AEBetatik erantzun dio gaur Jesus Egigureni, horrek egin dizkioen kritiken ostean. Lehendakariak esan du berak ez duela Egigurenen iritziarekin bat egiten eta beti "kiskali" dela bakearen alde; bakea bere "obsesio" izan dela gaineratu du. Bide batez berak eta Eusko Jaurlaritzak Egiguren "beti" babestu dutela adierazi du Lopezek, PSE-EEko presienteak ez dutela ulertzen salatu ondoren.

Lehendakariarekin oso kritiko agertu da Egiguren gaur El Periódico de Catalunya egunkariak kaleratu duen elkarrizketan. Egigurenek dio Lopezek gehiago arriskatu behar zuela, dena eman, "baita erreko bazen ere eta Madriletik egurra emango bazioten ere". Hausteleek horretarako aukeratu zituztela dio, eta politikariak etorkizuna aurreikusten jakin behar duela. Lehendakariak zuhurregi jokatu duela dio Egigurenek.

"Tsunami abertzalea"

Egigurenek esan du beti amestu duena bizitzen ari dela, baina penatuta agertzen da "batzuk" ez dutelako ikusi aurrean izan duten aukera eta "ez dira konturatu bakearen unea zela". Ondoren zehazten du horiek Espainiako Gobernua eta Eusko Jaurlaritza direla, eta orain dela lau urte ez bezala, zuhurregi jokatu dutela orain. "Bilduri aurrea hartzeko aukera eman dio horrek, bakearen bandera bere eginez, eta horrek tsunami abertzalea eragingo du".

Bere alderdian ez dutela ulertu salatzen du Egigurenek, eta mugak izan dituela. "Eta isildu beharra izan dut lehendakariari kontra ez egitearren. Bere hitzetan "Batasunak" zeharkatu du "muga", eta Arnaldo Otegi zergatik dagoen espetxean ez duela ulertzen. "Legea betetzeko dago, baina horrekin jokatu daiteke", esan du. Egigurenek azaltzen du lehendakariak ez ziola jaramonik egin "Batasunak" batzarretan "indarkeriari uko" egitea erabakitzen ari zela esan zionean.

ETAk konferentziaren ondorioekin bat egingo duela uste du

ETAren balizko agiri batez esan du Egigurenek ez duela desegingo dela esango. Bere ustetan Aieteko konferentziaren ondorioekin bat egingo du, "eta hori asko da". Indarkeria amaitu dela dio PSE-EEko presidenteak, eta politikariek amaiera hori antolatu behar zutela, "ez negoziatu", besteak beste, espetxe politika aldatuz: "Azken finean ETA presoak dira, eta presoak dauden bitartean, ETA dago. Logikaz, etxetik gertu egon beharko lukete".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna