Albistea entzun

komunikabideak

Iruñerrian ETB ikusteko hedagailua zigilatu egin du Guardia Zibilak

Maiorga Ramirezek salatu du "gehiegikeria" juridiko bat dela, eta Nafarroako eskuinaren "sektarismoa" adierazten duela gaitzetsi du

Berria.info -

2012ko martxoak 7

Azkeneko bi hilabete pasan Iruñerrian ETB lurreko telebista digitalean (LTD) ikusi ahal izan da, euskaltzale batzuek Erreniegan jarritako hedagailuari esker. Dagoeneko, ordea, ezin da ikusi, Guardia Zibilak zigilatu egin baitu.

Maiorga Ramirez Nafarroako EAko koordinatzailearen arabera, "bidegabekeria juridiko bat" da Espainiako Gobernuak egindakoa eta Nafarroako eskuinaren "sektarismoa" adierazten du. Gogoan hartu duenez, Nafarroa osoan euskara hutsezko telebista ikusi ahal izatea oztopatu du Nafarroako Gobernuak; orain, berriz, PPren exekutiboak EAko militanteek euren kabuz jarritako hedagailuaren aurka egin du. EAk neurri juridiko guztiak hartzea ("salaketa barne") aztertuko du, herritarrek askatasunez telebista ikusteko eskubidea eta hizkuntza eskubideak urratu direlakoan.

EAko militante batzuek hamabi mila euro ipinita ikusi ahal izan da ETB eremu hartan. Otsailaren hasieran haien kontrako zigor espedientea jarri zuen abian Espainiako Gobernuak, hedagailua baimenik gabe ipini zutela argudiatuta. Carmen Alba Orduna Espainiako Gobernuak Nafarroan duen ordezkariak hartu zuen neurria.

EAko kideek, "gezurretan ibiltzea" egotzita, Nafarroako Gobernuari eta Eusko Jaurlaritzari ardurak hartzeko eskatu zieten urtarrilaren 11n. "Arazoa ez da ekonomikoa, arazoa borondate falta da", zioen Maiorga Ramirez Nafarroako EAko koordinatzaileak.

2009ko uztailean, Patxi Lopez Jaurlaritzako lehendakariak eta Nafarroako Gobernuko orduko lehendakari Miguel Sanzek protokolo baten bidez ETB1 zein ETB2 LTD bidez ikusi ahal izatea hitzartu zuten. Bi urte eta erdi geroago, ETBko bi kateak seinale analogiko bidez baino ezin dituzte ikusi nafarrek. Kostu ekonomiko osoa milioi bat eurokoa dela argudiatuta, Nafarroako Gobernuak Jaurlaritzak ordaintzea nahi du, eta Jaurlaritzak, berriz, Nafarroako Gobernuak ordaintzea. 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...