futbola

Javi Martinezek Bayer Munichen jokatuko du

Fulbol Liga Profesionalaren egoitzan izan da jokalaria, Athleticeko eta Bayerneko hainbat arduradunekin batera. Jokalariak azterketa medikoa pasa du gaur goizean, nahiz eta bidaiatzeko baimenik ez izan. Klubean harridura sortu du bidaiak, eta azalpenak eskatu dizkio. Bideoa: Javi Martinez, Munichen, ustez Bayernen instalazioetan (Sky Sports).

Berria -

2012ko abuztuak 29

Javi Martinezek Bayern Munichen jokatuko du aurrerantzean, hala baieztatu baitu Alemaniako taldeak gaur arratsaldean. Jokalariak hainbat ordu pasatu ditu Madrilen, Futbol Liga Profesionalaren egoitzan, bere etete klausula ordaintzeko behar zituen 40 milioi euroekin. 13:20an iritsi da Martinez Madrilera, Athleticeko eta Bayerneko hainbat arduradunekin, eta akordioa lortu dute.

2017ko ekainaren 30era arteko kontratua sinatu du Martinezek. "Oso pozik eta harro nago, historia handiko talde batean jokatu ahal izango dudalako", adierazi du sinatu berritan.

Uda hasieran agertu zuen Bayernek aiegiarra fitxatzeko asmoa. Athletic, ordea, ez zegoen prest, eta Josu Urrutiak behin baino gehiagotan esan du ez zegoela salgai, Athletic uzteko modu bakarra etete klausula ordaintzea zela. 2016ko ekainaren 16a arte du kontratua jokalariak Bilboko klubarekin.

Javi Martinez Athleticeko jokalaria Munichera joan zen atzo gauean, eta Bayernen azterketa medikoa pasatu du gaur goizean. BERRIA.INFOk jakin duenez, jokalariak ez zuen horretarako baimenik, eta bidaiak harridura eta haserrea eragin du. Klubak azalpenak eskatu dizkio jokalariari, bidaia ezer jakinarazi gabe egiteagatik. Gaur goizean Athleticeko jokalaria zela argudiatu du Bilboko klubak.

Etzi amaituko da fitxaketak egiteko epea

Ostiralean amaituko da jokalariak fitxatzeko egiteko epea. Orain, Fernando Llorente eta Javi Martinez lehen taldetik bereizita daude, Athletic utzi nahi dutela iragarri ondoren. Denboraldi honetan soilik bi partida jokatu ditu Martinezek, Sestao River eta Barakaldoren aurkako lagunartekoak. Llorentek Slavenen eta Lilleren aurka jokatu zuen, Sestaoren aurka jokatzeaz gain.

Javi Martinezen etorkizuna argituta, Fernando Llorenterekin zer gertatuko den argitzea falta da. Aurrelariak esan du Athletic utzi nahi duela, baina kasu horretan ere Athleticek sendo eutsi dio bere jarrerari. Martinez bezala, Llorente ere ez du sartu Bielsak azken deialdietan. Bihar Europako Ligako partida jokatuko du Athleticek, Helsinkin, 19:00etan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna