François Fillon Frantziako lehen ministro ohiak berretsi du UMP Herritarren Mugimenduaren Aldeko Batasuneko barne-hauteskundeak berriro antolatuz gero, atzo sortutako talde parlamentario propioa deseginen duela, eta justizian abiatutako prozedura guztiak bertan behera utziko dituela.
Jean François Cope UMPko presidente izendatu berriak, berriz, erreferenduma egitea proposatu zuen atzo, hauteskundeak berriro antolatu behar diren erabakitzeko. Gaur goizean, ordea, atzera egin du, erranez Fillonek talde parlamentario propioak jarraituko duen bitartean erreferendumik ez dela egingo.
“Zatiketa eta nahasmendu ikuskizun” horrek hainbat UMPko arduradun eta Nicolas Sarkozy bera “lazten” ditu, Brice Horteffeux ministro ohiaren arabera. “Lerrokatu-gabeen” mugimenduaren ahotsa gero eta ozenago entzuten da hedabideetan. “Alderdia ez da inoren bahitua, militanteena da” erran du Nathalie Kosciusko-Morizet ministro izandakoak, gehituz konponbide bat ahal bezain laster aurkitu behar dela.
