Durangoko Azoka

Euskarazko Wikipediaren elikatze masiboaren proiektua aurkeztu dute Kabi@n

Ikastetxeetako ikasleen lana sareko entziklopedia elikatzeko baliatzea da asmoa, Maite Goñik azaldu duenez.

Euskarazko wikipedia elikatzeko egitasmoa.
Euskarazko wikipedia elikatzeko egitasmoa. / Luis Jauregialtzo/ARP

Juan Luis Zabala -

2012ko abenduak 7

Maite Goñi irakasle eta blogariak euskarazko Wikipediaren elikatze masiborako proiektuaren berri eman du gaur Durangoko Azokako Kabi@ gunean. Ikasleek irakaskuntzan egindako lanak euskarazko wikipedia elikatzeko baliatzea da proiektuaren funtsa, bi aldetatik onuragarri izan daitekeelakoan: batetik, euskarazko wikipedia indartzeko eta, horrekin batera, euskararen erabilera ikasketetan eta sarean; bestetik, ikasleak ere motiba daitezen, ikusirik egiten duten lana baliagarria dela, eskolarako erabilera akademikotik harago, gizartearentzat.

Euskarazko Wikipedia duela 11 urte jarri zen abian, 2001eko abenduan, eta 147.000 artikulu ditu gaur egun, Unai Fernandez de Betoñok, Euskarazko Wikipediaren adiministratzaileetako batek, adierazi duenez. Kopuru hori oso altutzat jo daiteke, euskarak duen hiztun kopuruarekin alderatuz gero. Adibidez, ingelesezkoak lau milioi artikulu ditu, baina aintzat hartu behar da ingeles hiztunak 600 milioi direla. Beraz, Fernandez de Betoñok azaldu duenez, euskarak 700.000 inguru hiztun dituenez, Euskarazko Wikipediak bost hiztuneko artikulu bat du; ingelesezkoak, aldiz, 146 hiztuneko artikulu bat. Gaztelaniazko Wikipediak, berriz, 500 hiztuneko artikulu bat du. “Beraz, ehun bider langileagoak gara”, komentatu du, txantxetan, Fernandez de Betoñok.

Urtetik urtera gorakada handia izaten du Euskarazko Wikipediaren artikuluen kopuruak. Ingelesezkoa, aldiz, “beste fase batean” dago, Fernandez de Betoñok azaldu duenez. “Artikulu kopuru handia dute dagoeneko, eta orain lan gehiago egiten dute artikuluak sakontzen artikulu berriak gehitzen baino. Gu oraindik ez gara fase horetara iritsi, baina iritsiko garela espero dut”.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna