NUKLEARRAK

Garoñako zentralaren jarduna eten egingo dute igandean

Albiste agentzien arabera, langileei jakinarazi diete igandetik astelehenerako gauean, 00:00etan, erreaktorea geldiarazi egingo dutela. Enpresak dio horrek ez duela esan nahi betirako geldituko dutela.

Garoñaren aurkako protesta, 2010ean
Garoñaren aurkako protesta, 2010ean / Juanan Ruiz/ARP

Garikoitz Goikoetxea -

2012ko abenduak 11

Igandean eten egingo dute Garoñako zentral nuklearraren jarduna. Efe agentziak jakinarazi du enpresak langileei adierazi diela igandetik astelehenerako gauean geldituko dutela erreaktorea, 00:00etan. Erregaia erreaktoretik ateratzen hasiko dira orduan, eta igerilekuetan utziko dute gordeta. Enpresak dio erabaki horrek ez duela esan nahi Garoña betirako itxiko dutenik; berriro martxan jartzea litekeena dela adierazi dute.

Finean, zergak ez pagatzeko modua taxutzen ari da Nuclenor enpresa. Energiari buruzko zerga aldaketak bideratzen ari dira Espainiako Parlamentuan. Dauden-daudenean aurrera ateratzen badira, zerga gehiago jarriko dizkiete zentral nuklearrei; Garoñako zentralagatik 150 milioi euro pagatu beharko lituzkeela kalkulatu du enpresak. Zirrikitu bat badu, ordea, lege proiektuak: urtarrilaren 1ean martxan dauden azpiegituren jarduna zergapetuko dute. Zertan ari da, beraz, Nuclenor? Garoñaren jarduna urtarrilaren 1erako eten egin nahi du, eta aztertuko du urtea hasi ondoren berriro martxan jarrita zergak ordaintzetik libratuko ote litzatekeen. Horregatik ez dute itxiera behin betikotzat jotzen.

Baimena luzatzeko ez zuenez eskatu enpresak, ixteko data datorren urterako du jarria Garoñak: 2013ko uztailaren 6an zarratu beharko lukete legez. Hedabide hainbatek dagoeneko aurreratu dute, ordea, Espainiako Gobernua eta Nuclenor negoziatzen ari direla, zirrikituren baten bila, jarduna luzatzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna