Arabako PSE-EEko sektore berritzaileko aurpegi ezagunena izango da igande honetako kongresuan bere ildokoen hautagaia lurralde horretako sozialisten idazkari nagusi izateko. Horrela ebatzi dute gaur arratsean, hautagaia izendatzeko egin dituzten hauteskunde primarioetan. Alonsok bertaratatutakoen botoen %90 jaso ditu.
Batzarraren aurrean egindako hitzaldian, Alonsok bost konpromiso hitz eman ditu. Lehena Arabako PSE-EEren "balioetan oinarritutako eraberritzea" agindu du: "zintzotasuna", "zorroztasuna", "gardentasuna", "eztabaida" eta "parte-hartzea" izango dira balio horiek. Bigarren konpromisoa "sozialismo berdea", "fiskalitate berria" eta "gizarte eredu solidarioa" defenditzea izango da. Hirugarrena, berriz, "alderdia berritzea": "Alderdia prestatu behar dugu beste pertsona batzuk etor daitezen (oraindik etorriko direla ere ez dakitenak) eta haiek alderdia altxa, gaztetu eta modernizatu dezaten", esan du.
Hautagaiak beste bi konpromiso aipatu ditu, bere "uztatik" atereak: Idazkari nagusi hautatzen badute soilik idazkari nagusi izango dela, ez duela kargu publikorik beteko; eta idazkari nagusi hautatzen badute gehiago izango dela "idazkari" eta gutxiago "nagusi".
Prietoren erabakiaren zain
Sektore ofizialak ez du oraindik bere hautagaia izendatu. Ohikoa da PSE-EEren lurralde kongresuetan, ia azken unera arte hautagaiak ez aurkeztea. Baina ia ziurtzat jo daiteke egungo idazkari nagusi Txarli Prietok hautagaitza aurkeztuko duela.
Kongresuan parte hartuko duten ordezkarietatik 59 sektore ofizilaren ingurukoak dira, eta 33 sektore berritzailekoak.
Araban eta Bizkaian ere lurralde kongresuak egin behar dituzte asteburu honetan. Haietan, ordea, lasaiagoak izango dira, Araban ez bezala ez baitago zatiketarik. Jose Antonio Pastorrek eta Iñaki Arriolak errepikatu egingo dute karguetan, Bizkaian eta Gipuzkoan.
