Sindikatuak

Raul Arza hautatu dute UGT-Euskadiko buru

Lehia estua izan da sindikatuak Barakaldon egin duen kongresuan Arza eta Pilar Collantes hautagaien artean. 24 botoren aldearekin irabazi du Arzak.

Berria.info -

2013ko maiatzak 24

Raul Arza izango da Damaso Casadoren ordezkoa UGT-Euskadiren gidaritzan. Bi hautagai zeuden sindikatuak Barakaldon atzo eta gaur egin duen kongresuan, Arza eta Collantes, eta lehia estua izan dela erakutsi du emaitzak. Botoen %55,65 jasota atera da garaile Arza. Guztira 132 boto eskuratu ditu, Collantesek baino 24 gehiago. 

EAEn 40.000 militante inguru ditu, eta 2.400 ordezkari enpresetan. Laugarren sindikatua da Araba, Bizkaia eta Gipuzkoan, ELA, LAB eta Euskadiko CCOOren atzetik. Arzaren lehen neurria, zuzendaritza taldea txikitzea izan da: orain artekoak 11 kide zituen —Arza bera ere zuzendaritzan zegoen—, eta aurrerantzean zortzi izango ditu. Berak gidatutako UGT-Euskadi "sendoagoa, batuagoa, dinamikoagoa, aldi berean beste dinsikatuekin lankidetzan ariko dena eta babes soziala bilatuko duena" izango dela agindu du.

"Kaleko sindikalgintza" bultzatuko duela azaldu du, eta Madrilekiko erabakimen handiagokoa. Arazo sozial eta ekonomikoei "alternatiba errealistekin eta erantzukizunez" erantzungo diotela ere nabarmendu du. Kargua hartzeaz batera aurreratu du ez dituela bi agintaldi baino gehiago egingo idazkari nagusi postuan. Hau da, ez dituela zortzi urte baino gehiago egingo. Casadok, hain zuzen, 11 urte egin ditu UGT-Euskadiren gidaritza lanetan. 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna