euskara

"Tresna berria eta erabilgarria"

BERRIAren estilo liburu digitala aurkeztu dute Bilbon. Edukiak etengabe eguneratzeko aukera emango du, baita erabiltzaileen galderak eta iradokizunak jasotzeko modua ere. Martxan dago ikusi nahi duenarentzat.

Berria -

2013ko ekainak 18

BERRIAk Internetera ekarri du bere estilo liburua, bertako kazetariek egunero dauzkaten galderei eta zalantzei emandako erantzunetatik sortutakoa. "Eguneroko premietatik ateratzen den estilo liburua da, benetako arazoei benetako konponbideak ematen saiatzen dena”. Irene Arrarats BERRIAko euskara arduradun eta estilo liburuaren zuzendariak eman ditu azalpenok. Sarean bizi-bizi dagoen lanaren edukiei buruz aritu da, Bilbon Euskaltzaindiak duen egoitzan.

Martxelo Otamendi BERRIAko zuzendariak hasi du aurkezpen ekitaldia. Harekin egon dira Andres Urrutia Euskaltzaindiko lehendakaria eta Mario Fernandez Kutxabankeko presidentea. Kutxabankek babestu du estilo liburua Interneten.

Horiez gain, baina, euskararen munduko hainbat lagun bildu dira aurkezpenean. Egunez ongietorri beroa egin diote sare sozialetan euskaldunek estilo liburuari, eta aurkezpenean ere zoriondu egin dute Euskaltzaindiak eta Kutxabankek egindako lana. Otamendi harro agertu da egindakoarekin, eta laguntza eskertu du.

Estilo liburuaren garrantzia

"Estilo liburuak ezinbestekoak dira komunikabideentzat, zer esanik ez hizkuntza gutxituetan" esanez hasi du bere agerraldia Irene Arraratsek. Diseinu atsegina eta edukien arteko loturak nabarmendu ditu.

Baina kazetarientzat ez ezik, edozeinentzat ere bada tresna erabilgarria, kanpora begira atal interesgarriak eskaintzen dituena, besteak beste, idazkuntzari buruzkoa: hizkuntz eredua, esaldien egituraketa, puntuazioa aztertzen ditu. Adibideak ere ematen ditu. Andres Urrutia Euskaltzaindiko lehendakaria estilo liburuaren erabilgarritasunaz aritu da, eta Euskaltzaindiaren arauak eta gomendioak zabaltzeko tresna paregabetzat jo du, besteak beste.

Euskal Herriari eta munduari begirako atal bana ere jasotzen du. Euskal Herriko edozein txoko non dagoen, eta haren bereizgarriak. Gauza bera munduko herrialdeen inguruan. Galdetutakoari buruz estilo liburuak jakingarritzat jotzen duen ororen gaineko lotura guztiak egiten ditu gainera. Bilatzailea oso azkar doa, eta erabiltzaileak aurkitzen ez badu, bilatzen ari den horren gaineko galde-erantzunetarako aukera ematen du. 

Interneten nola idatzi behar den azaltzeko ere atal bat dauka, etengabe handituz joango dena eta baliagarri izango dena komunikabide askorentzat.

Iradokizunak egin nahi dituenak ere bere txokoa izango du estilo liburuan. "Zerbitzu hori ematen saiatuko gara", Arraratsek esan duenez.
 

Paperetik ziberespaziora

Orain dela sei urte aurkeztu zuten BERRIAren lehen estilo liburu paperezkoa. Urte hartan sortu zen Twitter, eta urte hauetan joan dira sortuz eta zabalduz Youtube eta Facebook, besteak beste, eta horrek guztiak komunikatzeko eta informatzeko modua aldatu du.

BERRIAren estilo liburua ere ez da estatiko geratu: handituz eta handituz joan da, moldatuz; atal berriak hartu ditu, eta, garrantzitsuena dena, paperetik ziberespaziora joan da.

Etengabe berritzen

Komunikazioaren premiak aldatuz doazen neurrian aldatuko da estilo liburu hau ere, bai neologismoei dagokienez, bai euskarri berrietan idazteko moduei dagokienez, eta bai bibliografiari dagokionez. Komunikazioaren mundua iraultza baten erdian dago, eta BERRIA Taldeak profesionaltasunez heldu nahi die lan egiteko modu berriei..

Estilo liburuak ezinbesteko tresnak dira komunikabideentzat, hainbat arlotako irizpide batasuna segurtatzen baitute. BERRIAren estilo liburua lagungarri ederra da kazetarientzat, eta neurri handi batean, jokabide egokien transmisiorako tresna.

Kazetarien egiazko premietatik sortua da, eta egiazko konponbideak ematen ditu, proposamen praktiko eta koherenteak. Estilo liburu hau praktikoa da, guztiz; praktikan eta esperientzian oinarritutakoa, eta erabilerraza.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna