16 urte dira dagoeneko Euskal Herriko tren istripurik larriena gertatu zela. Uharte Arakilen izan zen (Nafarroa), 1997ko martxoaren 31n: 18 hildako izan ziren, eta 100 inguru erietxeratu. Istripuaren kausa nagusia gehiegizko abiadura izan zela ebatzi zen: 30 kilometro orduko onartzen zuen tartean, 137 kilometro orduko abiadura zeraman trenak.
Eibarren (Gipuzkoa) ere tren istripu bat izan zen, bi urte lehenago: 1995eko otsailaren 27an izan zen, eta bost hildako eta 30etik gora zauritu izan ziren istripu hartan. Azitain inguruan izan zen ezbeharra, Eusko Trenbideak enpresako trena deskarrilatu ostean.
