Albistea entzun

Parekidetasuna

Txistuka hartu dute emakume bat, Elbeten mutildantzara sartzeagatik

Tradizioz mutilek soilik egin dituzte dantza horiek Baztanen. Herri batzuetan ohitura hori aldatzen hasia dute, baina beste batzuetan ez diete emakumeei parte hartzen uzten oraindik.

Berria -

2013ko irailak 16

Nafarroan, Elbeteko bestetako mutildantzetan, txistuka eta oihuka hartu dute emakume bat asteburu honetan, dantza egitera sartzeagatik gizonen artera. Eztabaida berotu egin zen dantzara sartutako emakumeen eta ikusleen artean, eta eten egin zituzten eguerdiko eta gaueko dantzak.

Ohituraz, gizonek bakarrik dantzatu izan dute Baztango mutildantzetan. Baina herri batzuetan aldatu dute ohitura hori, eta ekain honetan Plazara Dantzara taldea aurkeztu zuten, Elizondon, emakumeek ere dantza horietan parte hartzera bultzatzeko.

"Badakigu badirela emakume izateagatik gurekin dantzatu nahi ez duten baztandarrak", salatu zuen Plazara Dantzara ekimeneko kideek ekainean: "Ez digute partaide izaten uzten, tradizioa beraiek nahi duten bezala ulertzen ez dugulako".

Elbeteko mutildantzara sartu zen emakumea, hain justu, Baztango alkatea da, Garbiñe Elizegi. Lehenago ere sartu izan dira, bera eta beste emakume batzuk, Baztango mutildantza batzuetara. Eskualdeko herri batzuetan dantza horiek kendu ere egin dituzte festen programetatik, sortu diren eztabaidengatik.

Ostiralean, meza nagusia egin ostean, mutildantza egiten hasi ziren Elbeteko dantzariak, eguerdian. Tartean sartu zen Elizegi, dantzara. Txistuka eta oihuka hartu zuten ikusleetako askok, eta mutildantzan ari zirenak gelditu egin ziren. Dantza bukatu gabe utzi zuten.

Gauean ostera ere egitekoa zen mutildantza, eta berriz errepikatu ziren eguerdikoak. Elizegi eta beste hiru pertsona sartu ziren dantzarien ilaran. Eztabaida berotu egin zen dantzara sartutakoen eta ikusten ari zirenen artean, eta bertan behera gelditu zen ekitaldia, berriro ere.

Baztango Bilduko udal taldeak lehenago ere salatu izan du Elbeten emakumeak "bestatik baztertu" egiten dituztela. Iaz kaleratutako ohar batean, gaitzetsi zuen Elbeteko alkateak "pribatizatu" egin zituela dantzak, "emakumeak egun nagusiko mutildantzatik baztertzeko".

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...