Lou Reed: "Zer diozue Euskal Herriko gatazkaz?" (2008-10-23)

Estatubatuar musikariak euskal gaia atera du Bartzelonan, prentsaurrekoa ematen ari zela, eta kazetariei galdezka hasi da. "Herrialde bakoitzak bere gatazka du, eta denoi eragiten digute, ondorioak dauzkatelako".

Berria -

2008ko urriak 23

Bartzelonan da Lou Reed (New York, Ameriketako Estatu Batuak; 1942) musikaria, Kosmopolis nazioarteko literatura jaialdian parte hartzen eta, prentsaurrekoa ematen ari zela, kazetariei galdera hauxe egin die: "Zer pentsatzen duzue Euskal Herriko gatazkaz?".

Kazetariek aurrez finantza krisiaz eta AEBetako bankuez galdetu diote, eta hark: "Galdera ona, baina hemen literaturaz ari gara. Zer iruditzen zaizue euskal herritarrez hitz egiten badugu orain? Zer diozue? Alde edo kontra zaudete?". Ez dute erantzun kazetariek.

Mundu osoko gatazkez interesa duela azaldu du musikariak. "Herrialde bakoitzak berea du, eta denoi eragiten digute, ondorioak dauzkatelako".

Federico Garcia Lorca espainiar poetaren hobia irekitzeko Baltasar Garzon Espainiako Auzitegi Nazionaleko epaileak hartutako erabakiaz ere galdetu die Reedek. "Alde edo kontra zaudete?".

Musikariak esan du "nazkatuta" dagoela pertsona "iluntzat" jotzen dutelako. "Errealista naiz, besterik gabe", adierazi du.

AEBetako hauteskundeetan Barack Obama hautagai demokrataren alde bozkatuko duela jakinarazi du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna