euskal herria

Aranaldek intsumisio jarrera hartu du, Espainiaratzea eragozteko

Frantziako Polizia Jokin Aranalderen etxe inguruan izan da, baina BERRIAra bidalitako gutunean iragarri du bere jarrera. Kasazio Auzitegiak onartu egin zuen atzo Espainiak egindako euroagindu eskaera.

Aranalde, artxiboko argazkian. /
Aranalde, artxiboko argazkian. / Aitor Renteria

Berria -

2013ko azaroak 1

BERRIAri helarazitako gutun baten bidez, Jokin Aranalde Euskal Iheslari Politikoen Kolektiboko mintzaideak jakinarazi du "auzi politikoa" egin diola Frantziako justiziak. "Egoera horren aitzinean, pertsonalitate instituzional, politiko, mugimendu sozial eta kultur esparruko hainbat pertsonalitatek, jarrera intsumitu eta desobediente batez erantzun beharra mahairatu dute, EIPKren bide orria jendarteratu eta herriak defenda dezan, bi estatuen gainetik, prozesu demokratikoa bururaino eramateko" dio Aranaldek gutunean.

EIPKren bozeramaileetako bat izanik, berresten du azken deportatu eta iheslaria etxera ekartzeko engaiamendua. Pariseko Kasazio Auzitegiak asteazkenean onartu zuen Aranalderen aurkako euroagindu eskaria, eta gaur goizean Frantziako polizia zen Aranalderen etxe inguruetan, Irisarrin (Nafarroa Beherera). Hamar egun zituen Frantziako Poliziak Jokin Aranalde atxilotzeko, eta Kasazio Auzitegiaren erabakiaren biharamunean joan da haren bila. Aranaldek mobilizatzera deitu ditu eragileak "nahi eta behar dugun bakea lortze aldera".

"Torturak beldurtuta"

Aranalde iheslari politikoen mintzakidetza taldeko kide da. 1946an sortu zen, Gaztelun (Gipuzkoa). Frantziako Poliziak 2013ko ekainaren 24an atxilotu zuen Heletan (Lapurdi), Miarritzen egindako Herria Dugu Arnas ekitalditik astebetera. Euskal Iheslari Politikoen Kolektiboak ekainaren 12an plazaratu zuen mintzaideen zerrenda, eta horretan ageri zen Aranalde.

"Azken 50 urteotan Espainiak torturatu dituen 7.000 euskal herritarretatik bat nauzu" erran zion epaileari. Hiru aldiz atxilotu zutela Hegoaldean azaldu zion, eta torturatu zutela salatu zuen, eta beldurturik egin zuela ihes Iparraldera. Gisa berean, erran zion bizi arrunta egiten zuela Ipar Euskal Herrian, eta alaba bisitatzera joaten zela espetxera.

Euroaginduaren prozedurari jarraikiz, Parisko Kasazio Auzitegiaren erabakiak ez du helegiterik onartzen. Amaia Errekarte defentsa abokatuak jakinarazi duenaren arabera, Paueko prokuradore nagusiak hamar eguneko epea du Aranalderen Espainiaratzeko. Auzitegiak erabakia helarazi die abokatuei baina hiru aste ditu horren oinarriak jakinarazteko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna