euskal herria

Gipuzkoako ikastetxeetara ere heldu da Espainiako Defentsa Ministerioko Errekrutatze sailaren lehiaketa deialdia

Espainiako armadak "defentsa nazionalean eta nazioarteko misioetan dituzten eginkizunak babesten eta goratzen" dituen lana saritzea du helburu 'Militar espainiar bati gutuna' lehiaketarekin.

Berria -

2013ko azaroak 1

Nafarroako ikastetxeetara ez ezik Gipuzkoakoetara ere heldu da Espainiako Armadaren deialdia, Batxilergoko lehen eta bigarren mailako gazteek parte har dezaten. "Herritar guztien zerbitzura, bakearen, segurtasunaren eta giza eskubideen alde" militarrek egiten duten lana hobekien goraipatzen duenak iPad bat eskuratuko du. "Espainiako Konstituzioak indar armatuei ematen dizkion misioak, eta haiek zuzenbide estatu baten bitarteko tresna gisara duten garrantzia" azaldu beharko da lan horietan.

Espainiako Defentsa Ministerioko Errekrutatze saileko kudeatzaile Jose Miguel Andresen izenean iritsi da gonbitea, eta bere eskura dagoen informazioa eta materiala errazteko eskaintza egiten du.

Nafarroako Hezkuntza Departamentuak dagoeneko bideratu du lehiaketan parte hartzeko deialdia, eta hori salatzeko gaitzespen mozio bat aurkeztu zuten atzo Aralar-NaBaik eta Bilduk Nafarroako Parlamentuan, oso larritzat jotzen dutelako Nafarroako Hezkuntza Departamentuak Espainiako Gobernuak antolatutako lehiaketan parte hartzera deitu izana.

"Hezkuntza eremuan militarismoaren baloreak bultzatzen dituen lehiaketa hau Hezkuntza Departamenduak antolatu izana oso larria da. Ez du inolako hezkuntza helbururik eta bai helburu ideologikoa; izan ere, Defentsa Ministerioak lanak aukeratuko baititu", ohartarazi dute.

Mozio horretan Nafarroako Gobernuari eskatu diote deialdi horren inguruko iragarkiak kentzea, "erabat ideologikoa" delakoan: "Ez dago bideratuta hizkuntza gaitasunak lortzeko, ezta baloreen hezkuntzan ezta elkarbizitza baketsuan ere".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna