euskal presoak

Fernandez Arrindaren aldeko elkartasun taldea Efe-ren Erromako egoitzan sartu da

Lander Fernandez Arrinda presoaren egoera salatzeko komunikatua argitara eman zezala eskatu diote berri agentziari; tentsio uneak izan dira, Europa Press-en arabera.

Okupazioaren argazkia. /
Okupazioaren argazkia. / Un caso basco a roma

Berria -

2013ko azaroak 7

Erromako egoitzan sartu dira hamabost bat herritar Lander Fernandez Arrinda preso bilbotarrari babesa adierazteko asmoz. Haren aldeko komunikatu bat argitara eman zezan eskatu diete agentziako kazetariei, Europa Press agentziak egin duen kontakizunaren arabera. Asturiasko printzeen koadro bat kendu, telefono batzuk erauzi eta hika-mika izan da kazetarien eta ekintzaileen artean, hango langileek esan dutenez. Tentsio unerik handiena presoen aldeko zapia jartzen saiatu direnean gertatu da.

Gaur egun Madrilgo Estremera espetxean dago. Italiatik Espainiara apirilean estraditatu zuten, Italiako Auzitegi Gorenak hala erabakita. Italiako Polizia bilbotarra atxilotzera joan zen Erromako bere etxera, baina ez zuen lortu, etxeko atarian 60 lagunek oztopatu baitzuten hura atzematea. Etxe barruan ere beste 30 bat lagun batu ziren, tartean bere abokatua eta bi parlamentari. Poliziarekin negoziatzen aritu ondoren, abokatuaren autoan eraman zuten polizia etxera.Italiako Auzitegi Gorenak etxeko atxiloaldia ezarri zion ia urtebete lehenago.

Elkartasun sarea Erroman

Urtarrilaren 15ean onartu zuen Erromako Auzitegiak Fernandezen estradizioa, baina bilbotarrak helegitea aurkeztu zuen Auzitegi Gorenean. Zehazki, bi helegite aurkeztu zituen: bata, Europako Giza Eskubideen Auzitegian, prozedura blokea zezala eskatzeko, eta, bestea, Administrazio Auzitegian, Justizia ministroaren balizko erabakia geldiarazteko. Orduan Fernandezek BERRIAri adierazi zion Erromako Auzitegiak Espainiaren eskaera atzera botako zuen esperantza zuela, hein handi batean, Erroman sortu den elkartasun sareak egindako lanagatik.

Espainiako Auzitegi Nazionalak terrorismo delitua leporatzen dio Fernandezi. 33 urte ditu, eta iazko ekainaren 16an atxilotu zuten. Auzitegi Nazionalaren arabera, ihes eginda zegoen Fernandez, nahiz eta 2011ko uztailaren 8an Getxoko jaietan euskal presoen aldeko elkartasun zozketarako txartelak saltzeaz absolbitu zuten. ETA finantzatzen laguntzea leporatuta Auzitegi Nazionalak jarri zion hiru urteko zigorra kendu zion Gorenak orduan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna