Erreakzioak. Bellonen heriotza ikertzeko eskatu dio EAJk Espainiako Gobernuari

 

Berria -

2014ko otsailak 6

EAJ

Arkaitz Bellon euskal presoaren heriotza ikertzeko eskatu du EAJko legebiltzarkide Joseba Egibarrek, eta atsekabea azaldu du presoaren heriotzaren aurrean: "Autopsiatik harago, beharrezkoa da argitzea zein egoeratan gertatu den heriotza eta aurretik artatu ote zuten". Espetxe politika "errotik" aldatzeko eskatu dio Espainiako Gobernuari.

EH Bildu

Eusko Legebiltzarreko EH Bilduko ordezkariek orri bana zabaldu dute gaurko osoko bilkuran, presoen sakabanaketa politika salatzeko. "Espetxe politikak hil egiten du. Sakabanaketari ez", zioen. Ondoren, Belen Arrondo koalizioko legebiltzarkideak hitza hartzean, elkartasuna adierazi dio Arkaitz Bellonen familiari.

Ernai

"Gogor salatzen dugu Espainiako zein Frantziako estatuek darabilten mendekuan oinarritutako espetxe politikaren hatzaparretan emandako hilketa hau, urtebeteren buruan hirugarrena". Hala salatu du Ernai gazte antolakundeak Arkaitz Bellon presoaren heriotza.

Urtarrilaren 11n Bilbon eginiko manifestazioa gogoan izan du Ernaik, eta kritikatu du Espainiako Gobernuak "ukazioan eta mendekuan oinarritutako" politikei eusten diela hala ere: "Gobernu horrek berak hartutako erabakien ondorio zuzena da Arkaitzen heriotza".

Egiari Zor fundazioa

"Heriotza, mina eta sufrimendu itzela sortzen duen espetxe politika krudel hau behingoz amaitzeko exijitzen dugu", esan du ohar batean Egiari Zor fundazioak. Halaber, elkartasuna adierazi dio Bellonen sendiari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna