UKRAINA

Krimeak independentzia aldarrikatu du

Errusiarekin bat egiteko asmoa berretsi du errepublika autonomoko parlamentuak, eta horretarako aurretik eman beharreko urratsa egin du independentzia aldarrikatuta.

Janukovitxen agerraldia, Errusian.
Janukovitxen agerraldia, Errusian. / Sergei Ilnitsky/EFE

Jon O. Urain -

2014ko martxoak 11

Krimeako Parlamentuak Ukrainarekiko independentzia aldarrikapena onartu du. Ehun parlamentarik osatzen dute ganbera, eta horietatik 78k babestu dute aldarrikapena. Onartu eta berehala sartu da indarrean. Horrez gain, Errusiarekin bat egiteko asmoa berretsi du parlamentuak.

"Krimea, estatu independente gisa, Errusiako Federazioari zuzenduko zaio erreferendumaren ostean, Errusiarekin bat egitea proposatzeko subjektu federatu gisa", azaldu dio Krimeako Parlamentuko bozeramaile batek Ria Novosti agentziari.

Adierazpenean, Kosovoko aurrekaria aipatu dute aldebakarreko independentzia defendatzeko, eta azaldu dute erabaki hori igandeko erreferendumean berretsi beharko dutela herritarrek. Legez kanpokotzat jo du galdeketa Ukrainako behin-behineko gobernuak.

Erreferendumak bi galdera izanen lituzke. Bata, parlamentuak babestutakoa —"Ados zaude Krimea Errusiari batzeko, Errusiako Federazioaren zati eratzaile gisa?"—; eta, bertzea, Ukrainan gelditu nahi dutenei aukera bat irekitzeko, baina gutxieneko estatusa erabateko autonomia izanen dela bermatuta —"Ados zaude Krimeako Errepublikaren 1992ko Konstituzioa berrezartzearekin, Krimea Ukrainaren zati izanda?"—. 1992ko konstituzioak estatu baten botereak ematen zizkion errepublika autonomoari —presidente bat eta atzerri politika propio bat barne—, baina bertan behera utzi zuen Kievek. Gehiengo sinplea lortuko duen galderak irabaziko du.

Bitartean, Errusia mendebaldeko Rostov Don hirian mintzatu da Viktor Janukovitx kargutik kendutako Ukrainako presidentea, eta oroitarazi du oraindik hura dela herrialdeko presidentea eta armadaren buruzagia. Salatu du Ukraina "ultranazionalista eta neofaxista" talde baten esku dagoela eta horiek "gerra zibila piztu" nahi dutela.

Kosovoko aurrekaria

 2008ko otsailaren 17an aldarrikatu zuen Serbiarekiko independentzia Kosovoko Parlamentuak. 2010eko uztailean, Nazioarteko Justizia Gorteak ebatzi zuen Kosovoren aldebakarreko independentzia aldarrikapenak ez zuela nazioarteko legeria urratzen.

Jarrera kontrajarriak izan ziren eta diraute Kosovoko estatuaren aitorpenaren aurrean. Egun, Nazio Batuen Erakundeko 109 herrialde kidek aitortu dute Kosovoren independentzia; Lesoto izan da azkena, aurtengo otsailean. Aitortzen ez dutenen artean daude Espainia, Errusia, Brasil eta Serbia bera. Nolanahi ere, bi herrialdeen arteko harremanak normalizatzeko akordio batera heldu ziren Serbia eta Kosovo iazko apirilean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna