Albistea entzun

Kultur sistema

Euskal kulturgintza sendotzeko neurriak adostu nahi ditu Geuk mugimenduak ekainaren 12an

Durangoko San Agustin gunean egingo dute bilkura, eta sortzaileak, bitartekariak, erakundeetako ordezkariak, hezitzaileak, kazetariak eta kontsumitzaileak deitu dituzte. Eguna ekintza proposamen sorta batekin amaitzea da helburua.

Guk Geure Kulturaz mugimenduaren agerraldia.
Guk Geure Kulturaz mugimenduaren agerraldia. Luis Jauregialtzo / ARP

Iñigo Astiz -

2014ko ekainak 2

Alarma deia da. “Kulturak egoera larria du gure herrian; erabakiak eta neurriak hartzeko ordua da. Kolokan ditugu ehun kulturala, lan baldintza duinak, gure kulturaren kalitatea, ikusgarritasuna, transmisioa; finean, iraupena”. Beltz irudikatu dute paisaia Guk Geure Kulturaz (Geuk) mugimenduaren bultzatzaileek, eta horregatik nabarmendu dute elkartzeko beharra. Kulturgintzako eragileak deitu dituzte, kulturgintza sendotzeko neurriak hitzartzera. Ekainaren 12an bilkura zabala egingo dute horretarako Durangoko San Agustin gunean. Goizetik arratsaldera bildu nahi dituzte bertan kultur sistemaren adar guztiak, eta paisaia aldatzeko ekintza proposamenak zehaztea da helburua. Premiazko neurrien egitasmoa zehaztea. Hainbat kultur eragilerekin batera aurkeztu dute ekimena gaur Bilbon.

Artikulazioa, aitortza eta ikusgarritasuna aipatu dituzte kezken artean. Baina antolatzaileak ez dira soilik beren izenean aritu. Otsailean egin zuten lehen bilkura Geuk-ekoek Durangon (Bizkaia), eta 150 pertsona baino gehiago batu zituzten. Ordukoan ere, elkarrizketan jarri zituzten sortzaile, kontsumitzaile, bitartekari, kazetari, hezitzaile eta kultur teknikariak. Diagnosia egin nahi zuten lehen saio hartan, eta orduko ondorioak bildu eta sailkatu ostean, bigarren urratsa egin nahi dute orain. Euskal kultur sistema “osasuntsuago eta sendoago” bat sortzeko proposamenak zehaztu nahi dituzte.

Proposamenak egiteko epea zabalik

Hasiak dira proposamen batzuk jasotzen, eta zabalik izango da ekarpenak egiteko epea bilkura egunera bertara arte. Batzarra hobeki prestatzeko, ordea, proposamenak ekainaren 6a baino lehen egiteko gomendioa egin dute bultzatzaileek. Geuk-en webgunean jarritako fitxak bete beharko dira horretarako, proposatutako ekintzaren helburuak, ezaugarriak eta bestelakoak zehaztuta. Itxi gabe dago, halere, bilkuraren mamia. Egunean bertan sortutako eztabaidetan hitzartuko dira azken egitasmo proposamenak.

Taldeka egingo dute lan oraingoan ere. 09:30etik, 18:30era. Batzarra hasterako horma batean jarriko dituzte jasotako proposamenak, eta taldeka antolatuko da jendea gero, haien inguruan eztabaidatu eta zehaztapenak proposatzeko. Eguna neurri edo ekintza proposamen sorta batekin amaitzea da helburua.

Erakundeen parte hartzea

Zabala da deialdia, antolatzaileek behin eta berriz zehaztu dutenez. Erakundeetako ordezkariek ere bertan egoteko aukera badutela azaldu nahi izan dute horrekin bilkuraren bultzatzaileek. Kultur eragileek antolatu dute ekimena, baina kultur sistema osoa deitu nahi dute Durangora. Eta sistema horren parte irudikazen dituzte erakundeak ere GEUKekoek. “Hau ez da erakundeen aurkako ezer”. Eztabaida gune bat sortzea da helburua. “Gure lana da etorkizunean formatu honek izatea indargune nahikoa, proposamenak bertan egin ahal izateko”. Durangon adosten dena, halere, Eusko Jaurlaritzari, Nafarroako Gobernuari, aldundiei eta udalei ere aurkezteko asmoa azaldu dute.

Zortzi elkarte eta erakunde dira, berez, ekimenaren sustatzaileak. Euskal Herriko Profesionalen Dantza Elkartea, Ahotsenea, Euskal Aktoreen Batasuna, Karraskan, Kultura Abierta, Kultura Live, Musika Industrien Elkartea eta Soinueder. Zabalagoa da, ordea, talde eragilea, eta ehunka kulturgileren atxikimendua ere jaso du deialdiak. Zabalik da, gainera, atxikimendua azaltzeko aukera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

2003. urtean heldu zen azoka Landakora, eta hor finkatu du egoitza. ©ARITZ LOIOLA / FOKU

Salbuespenean salbuespen

Itziar Ugarte Irizar

Elizpean hasi eta Landakora heldu, mende erdi pasako bidean 'liburu eta disko azokaren' etiketa galdu, eta «kultur plaza» bihurtu da azoka. Garai «gozoenean» iritsi da «atzerapausoa» batzuentzat
Gizon bat, eskailera azpian ezkutatuta, irakurtzen. ©ARITZ LOIOLA / FOKU
Diskoez haragoko hamaika formatu topatu daitezke egunotan Durangoko Azokan. ©ARITZ LOIOLA / FOKU

Diskorik entzuten ez dutenei diskoak saltzea

Iñigo Astiz

Durangoko Azokan argi ikusten da musikagintzaren sektoreak formatuekin duen korapiloa: egun, sarean entzuten du jende gehienak musika, eta formatu fisiko berrien bila dabiltza sortzaileak
 ©ARITZ LOIOLA / FOKU

«Musikan eztanda bat dago: izen interesgarri asko ari da ateratzen»

I. Ugarte - A. Sarasola

Musikaren ikuspuntutik begiratu diote azokari, eta, haren bidez, egungo eszenari. Garai politean ikusten dute, batez ere belaunaldi berrien eskutik.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.