ARKEOLOGIA

Duela 3.500 urteko zeramika puskak aurkitu dituzte San Adriango koban

Aranzadi Zientzia Elkarteko kideek adierazi dute Brontze Garaiko gizarteen bizimodua berreraiki ahal izango dutela berreskuratutako 1.500 zati horiei esker.

Zeramika piezetako batzuk.
Zeramika piezetako batzuk. Gorka Rubio / ARP

Igor Susaeta -

2014ko ekainak 3

Zegamako (Gipuzkoa) aztarnategiaren garrantzia nabarmendu du, gaur goizean, Miriam Cubas Aranzadiko arkeologia saileko kideak. 1.500 puska horiek hainbat ontziren morfologia berreraikitzeko bidea irekide diete ikerlariei —ez dute ontzi bat bera ere topatu osorik—, eta osoenetako bi aurkeztu dituzte. Blanca Gomez de Segura Euskal Buztingintza Museoko zuzendariak, gainera, hainbat erreplika landu ditu.

Orokorrean ontzi handiak dira Cubasen esanetan —lurrazaletik 30 bat zentimetrora aurkitu dituzte—, eta horrek, lausoki bada ere, haien erabileraren pistak eman dizkiete. Iruditzen zaio elementu solidoak zein likidoak pilatzeko erabiltzen zituztela orain dela 3.500 urte. "Laboreak biltzeko, esaterako, eta baita esnea metatzeko ere". Izan ere, zeramika zatiez gain, garaiko fauna eta floraren aztarnak ere aurkitu dituzte ustiaketetan. "Talde sedentarioak ziren, gutxi gorabehera; artzainak eta nekazariak"

Cubasek adierazi du Euskal Herriaren iparraldeko zeramika zatirik zaharrenak Kobaederrako (Lekeitio, Bizkaia) aztarnategian aurkitu zirela, eta Neolitokokoak, orain 5.000 bat urtekoak, direla.

1.500 zati horiek Gordailua Gipuzkoako Kultur Ondare Higigarriaren Zentrora, Irunera, eramango dituzte, aztertu ahal izateko. Aranzadiko kideak uztailean hasiko dira, berriro, San Adriango aztarnategia induskatzen. 2008an ekin zioten lan horri, eta pasa den abuztuan jakinarazi zuten duela 14.000 urteko aztarnak topatu zituztela haitzuloan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna