Politika

Abokatuen ustez, "ez da kasualitatea" haien aurka iragarritako polizia operazioa

Euren lana indargabetzeko eta polizia etxe, auzitegi eta espetxeetan egiten diren eskubide urrekaten lekukoak "paretik kentzeko" neurri gisa ulertzen dute abokatuen aurka iragarritako polizia operazioa.

Alfonso Zenon eta Ainhoa Baglietto, artxiboko irudi batean.
Alfonso Zenon eta Ainhoa Baglietto, artxiboko irudi batean. Luis Jauregialtzo / Argazki Press

Aitziber Laskibar Lizarribar -

2014ko ekainak 18

"Oso gogorra da, baina ez da sorpresa; ez da kasualitatea, ez da hutsetik sortua". Euskal presoen defentsa lanetan aritzen diren abokatuek euren kontra iragarritako polizia operazioaren irakurketa politikoa egin dute.

"Ez da kasualitatea", esan dute behin eta berriz Ainhoa Baglietto eta Alfontso Zenon abokatuek beste hogei lankiderekin egindako agerraldian. "Ez momentua ez jomuga, ez dira kasualitatea".

Izan ere, euren urteetako lana fruituak ematen ari denean etor daiteke atxiloketak iragartzen dituen polizia operazioa: EPPK-ko kideek Euskal Herriratzeko egin dituzten eskaerek jaso dituzten ezezkoen aurrean Europaraino joateko prestutasuna adierazi dutenean; Auzitegi Nazionalak berrogei gazte absolbitzeko kaleratu duen epaian inkomunikazio aldian egindako deklarazioak baliogabe utzi dituenean;  Estrasburgok "bizi osorako zigorra zekarren" 197/2006 doktrina baliogabetuta Espainiak dozenaka preso askatu behar izanaren "mina gainditu gabe duenean"; eta "gero eta jende gehiago hasi denean konturatzen zer gertatzen den Auzitegi Nazionalean, espetxeetan eta polizia etxeetan".

Horren guztiaren erantzun gisa kokatu dute Gara egunkariak abokatuen kontra iragarritako operazioa. "Batzuok egoera berriak aurrera egin dezan nahi dugu, baina beste batzuek gerra estrategiari eutsi nahi diote", ondorioztatu du Zenonek.

"Baina gu Auzitegi Nazionalean lanean aritzen garen abokatuak besterik ez gara. Eskubide urraketak salatzen ditugunak", adierazi dute. "Hemen gaude, ez gara ezkutatzen, eta egunero aritzen gara Auzitegi Nazionalean lanean". Hala jarraituko dutela adierazi dute, gainera.

Filtrazioaren arabera Poliziak abokatuak atxilotzeko duen asmoari buruz, "beste izugarrikeria bat" litzatekeela ohartarazi dute. Euren lana publikoki egiten dutela azaldu dute; gaur bertan agerraldi publikoa egin dutela eta aldiro egoten direla Auzitegi Nazionalean. "Zitazio bat igorri ordez, atxilotu egin nahi gaituzte, ohikoa bihurtu den moduan. Nola justifika daiteke?", galdetu du Bagliettok.

Ohiko lanean jarraituko dutela ziurtatu, eta etor daitekeen operazioa salatzeko lanari ere eutsiko diotela jakinarazi dute. Hasiak dira abokatuen elkargoei "gertatzen ari dena" azaltzen eta horien babesa eskatzen.
 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna