murrizketak osakidetzan

"Gutxiagorekin gehiago" eginarazi nahi dietela salatu dute sindikatuek

Manifestaziora deitu dituzte Osakidetzako langileak ostegunerako, 18:00etan, Bilbon.

Manifestaziora deitu duten sindikatuetako ordezkariak.
Manifestaziora deitu duten sindikatuetako ordezkariak. Argazki Press

Berria -

2014ko ekainak 23

Osakidetzako murrizketen aurka "erantzun gogorra" iragarria zuten sindikatuek, eta mobilizazioekin hasteko prest daude. Ostegunean kalera ateratzeko deia egin dute; 18:00etan hasiko da martxa, Bilboko Jesusen Bihotza plazatik. Deitzaileek —SATSE, ELA, LAB, SME, FFHE, CCOO, UGT eta ESK-k— Osakidetzako langileen %93 ordezkatzen dituzte.

Hiru helburu dituzte mobilizazioetarako. Alde batetik, enplegua sortzeko eta egonkortzeko proposamen bat nahi dute Osakidetzako zuzendaritzaren partetik. Bestetik, gaixoaldiak ordezkatzeari eta lanaldi murriztuen gaiari ere heltzeko eskatu dute. Azkenik, 2011ko garapen profesionaleko deialdia "berehala" gauzatu behar dela uste dute. 

Ekainaren 4an beste agerraldi bat egin zuten sindikatuek eskaera horiek egiteko, eta orain arte zuzendaritzaren aldetik izandako "isiltasuna" salatu dute gaur. Hori horrela, aldarrikapen nagusiak mahai sektorialean eztabaidatzeko eskatu dute berriro, eta urri amaierarako erantzunik ez badute mobilizazio gehiago izango direla ohartarazi dute. 

"Lantaldea %10 baino gehiago gutxitu da, ordu gehiago lan egiten dute eta soldata %20 murriztu da", azaldu du Agustin Gutierrezek. Haren arabera, egoera "haserrea" sortzen ari da langileen artean, eta zuzendaritzak, berriz, "gehiago gutxiagorekin" egiteko eskatzen die. "Gehiago gutxiagorekin ezin dugu egin, ahalegin handiarekin lan bera egin dezakegu".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna