"Jaietan aldarrikatzen ditugun balioak eguneroko bizimodura eraman nahi ditugu, sinesten dugulako jaiak horretarako tresna egokia direla", azaldu du Mireia Mochales Donostiako Piraten bozeramaileak. Horregatik antolatu dute Edozer dugu posible eguna uztailaren 9rako, Donostiak eta hiria bizitzeko moduek lekua izan dezaten Aste Nagusitik kanpo ere.
Goizean hasiko dira ekitaldiak. Haurrentzako antzara joko erraldoia egingo dute. Gazteentzat, berriz, muralak egiteko lantegia eta bertso hopa egongo dira. Euskaraz ikasten ari direnek mintzapraktika pirata egiteko aukera izango dute. Donostiako kontsumo taldeek jatekoa eta edatekoa ere emango dute.
Manu Chao Zurriolan
Arratsaldean, hizkuntza gutxituak dituzten herrialdeetako taldeen kontzertuak izango dira. Gauean ere izango dira kontzertuok. Zurriolako hondartzan jarriko duten oholtzan, Selektah Stepi, Skakeitan, Tania de Sousa eta Manu Chao-La Venturaren emanaldiak izango dira.
Beste herrietako jai batzordeekin harremanak indartzeko ere baliatu nahi dute Edozer dugu posible eguna. Erakusketa bat jarriko dute Zurriolako pasealekuan. "Herri eta auzoetako jai batzordeek beren esperientziak azalduko dituzte panelen bidez", adierazi du Batiste Ezeiza Donostiako Piraten bozeramaileak. Ezeizak piratekin harremanetan jartzeko deia egin die erakusketa horretan parte hartzeko interesa duten beste herri eta auzoetako batzordeei.
