euskara

Aitzindariak hasi dira '.eus' erabiltzen

92 entitatek osatzen dute domeinu berriaren lehen erabiltzaileen zerrenda. Horiekin bat egiteko aukera izango da irailaren 16tik azaroaren 18ra (Bideoa: Argazki Press).

Gotzon Hermosilla -

2014ko ekainak 29

ritsi da eguna. Gaurgero aktibatuta dago sarean .eus domeinu izena, hura erabiltzea erabaki duten 92 entitateen eskutik. Aitzindari horien artean daude erakunde publikoak, enpresak, hedabideak -BERRIA eta eskualdeetako Hitza guztiak barne-, eta euskalgintzako zein euskal kulturako elkarte eta erakundeak.

Gehienak atzo hasi ziren .eus domeinua erabiltzen, PuntuEus Fundazioak Bilboko Kafe Antzokian egindako agerraldiarekin batera, eta, esaterako, atzotik www.berria.eus helbidean aurki daitezke euskarazko egunkariaren edizio digitalaren edukiak. Falta direnak, berriz, datozen egunetan aktibatuko dituzte.

Aipatutako ekitaldian, 92 aitzindarien zerrenda aurkezteaz gain, orain arteko prozesuaren balorazioa egin zuen PuntuEus Fundazioak. Joan Mari Torrealdai PuntuEus Fundazioko lehendakariak nabarmendu zuen aitzindarien ekarpenak proiektuari eman dion bultzada, sustapenaren zein baliabide ekonomikoen aldetik, eta pozik agertu zen «aniztasuna» delako aitzindarien zerrendaren ezaugarri nagusia. «Guk eus. domeinua proiektu inklusibo moduan definitzen dugu, eta inklusiboa izango bada, badakigu aniztasun hori hasieratik bermatu delako izango dela».

Euskal kultura ikusgai

Zenbait elkarte eta erakunde aitzindaritako ordezkariek parte hartu zuten aurkezpenean, zerrenda osatzen duten 92 entitateen izenean. Cristina Uriarte Eusko Jaurlaritzako Hezkuntza, Hizkuntza Politika eta Kultura sailburuak, Aizpea Goenaga Etxepare institutuko zuzendariak, Hekimeneko Iban Arantzabalek, Athleticeko Jon Berasategik, AEK-ko Mertxe Mugikak, Hendaiako Herriko Etxeko ordezkari Michelle Mounios-Adurriagak eta Euskalteleko Nerea Enbeitak PuntuEus fundazioa zoriondu zuten egindako lanagatik. Egitasmoaren garrantzia nabarmendu zuten, «euskara, euskal kultura eta Euskal Herria sarean eta munduan ikusgai bilakatzeko» garrantzia.

Proiektuaren hurrengo fasea, abiarazteko aldia, irailaren 16an hasiko da. Euskal domeinua erabili nahi duten enpresa, elkarte eta erakundeek azaroaren 18ra arteko epea izango dute domeinu izenak eskatzeko, eta horiek abenduaren 3an aktibatuko dira, Euskararen Nazioarteko Egunarekin batera.

Egun horretan, abiarazteko aldia amaitu eta azken faseari ekingo diote, fase ireki eta orokorrari; orduan, norbanakoek izango dute domeinua eskatzeko aukera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna