Mundua

45 lagun hil dira Nigerian, ustez Boko Haramek egindako eraso batean

Herrialdearen iparraldean izan da erasoa, eta zibilak dira hildako gehienak.

Berria -

2014ko uztailak 15

Nigeriako komunikabideen arabera, astelehen goizaldean eraso zioten Dille herriari, Borno eskualdean. Hogei bat ibilgailutan heldu ziren milizianoak, eta nori jotzen zioten begiratu gabe, tiroka hasi ziren. Ondoren, su eman zieten hainbat etxe eta saltokiri. Orotara, 45 lagun hil zituzten, gehienak zibilak.

"Ezustean harrapatu gintuzten. Gehienak lo zeuden, eta otoitzek eta tiroek esnatu zituzten", azaldu du herritar batek. Hark beste askorekin batera mendira ihes egitea lortu zuen.

Erasoa amaitu eta bi ordura gerturatu zen armada herrira. Hegazkin batek ingurua aztertu zuen, baina ez zuen ezer aurkitu.

Nigeriako Gobernuak larrialdi egoera iragarria du Bornon, bertan egiten baitituzte eraso gehienak Boko Haram miliziakoek; horrek, baina, ez du indarkeria gelditzeko balio izan. Aurtengo urte hasieratik 4.000 pertsona hil ditu miliziak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna