MUNDUA

NBEk ikerketa independente bat eskatu du, Malaysiako hegazkinarekin gertatutakoa argitzeko

Ukrainak eta matxinoek elkarri leporatzen diote hegazkina erori izanaren errua. Berehalako su etena eskatu dute Amerikako Estatu Batuek, gorpuak berreskuratzeko. EBko Atzerri ministroek asteartean izango dute gaia aztergai.

Hegazkinaren arrastoak, Donetsketik gertu.
Hegazkinaren arrastoak, Donetsketik gertu. Alyona Zykina / EFE

Berria -

2014ko uztailak 18

Atzo erori zen Malaysia Airlines aire konpainiaren hegazkin bat Ukraina ekialdean, Donetsk eskualdean, eta 280 bidaiariak eta eskifaiako 15 kideak hil dira, 295 lagun guztira. Ukrainak eta ekialdeko matxinoek elkarri leporatu diote hegazkina misil batekin bota izana. NBEko Segurtasun Kontseiluak ikerketa independente bat eskatu du gertatutakoa argitzeko. Asteartean Europako Batasuneko Atzerri ministroek gaia aztertuko dute; gertatutakoari buruzko ondorioak egon daitezkeela aurreratu dute. 

Hainbat herrialdetakoak ziren bidaiariak: 154, Herbeheretakoak; 43, Malaysiakoak; 27, Australiakoak; hamabi, Indonesiakoak; bederatzi, Erresuma Batukoak; lau, Alemaniakoak; lau, Belgikakoak; hiru, Filipinetakoak; bat, Kanadakoa; eta beste 41 nongoak diren ez dute zehaztu.

Amerikako Estatu Batuetako Etxe Zuriko bozeramaile Josh Earnestek "berehala" su etena emateko eskatu die Ukrainari, Errusiari eta Ukraina ekialdeko matxinoei, gorpuak berreskura ditzaten. Samantha Power AEBetako ordezkariak miliziano errusiazaleei egotzi die hegazkinari eraso izana. Txinak, bestalde, herrialdeko aire konpainiei agindu die ez dezatela Ukraina ekialdearen gainetik hegan egin.

HIESari buruzko nazioarteko biltzar batera joatekoak ziren hegazkinean zihoazenetako ugari. Melbournen (Australia) egingo dute biltzarra igandetik aurrera, eta HIESa ikertzen ziharduten ikerlariak ziren hildako ugari. Hildakoetako bat izan liteke Joep Lange, HIESaren Nazioarteko Elkarteko presidente ohia.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna