Baionako Patxa plazako txosna gunea zutik da jada. Duela egun batzuk gazteek bi txosna jarriko zituztela iragarri zuten, eta jendea hartzeko prest dira orain. Ostiralean irekiko dituzte, 14:00etan, eta igandera bitarte egonen dira zabalik. Eztandarako prest da Baiona.
Txosnen inguruan gozatzeko egitarau oparoa ere prestatua dago. Ostiralean, 18:00etatik aitzina pintxo lehiaketa eginen dute, eta ondotik Patxaranga elekrotxarangak joko du. (Izena emateko [email protected] helbidera idatzi behar da). Larunbatean berriz, Gazte Eguna ospatuko dute. 12:00etan aperitifa alaitua, 13:30ean bazkaria 6 euroren truke, 16:00etan jokoak eta 18:00etatik goiti, azkenik, kontzertuak egonen dira: Arnas eta Inguma taldeak. Igandean, azkenik, Preso eta iheslarien aldeko elkartasun eguna eginen da. Bazkaria antolatu dute, 20 euroren truke.
Igandeko bazkari horrez gain, preso eta iheslarien aldeko mugimenduak antolatu ditu bertze hainbat ekitaldi. Atzo, erraterako, braderian parte hartu zuten, materiala salduz. Gaur berriz, Ekimen Herritarra deiturikoan, preso eta iheslarien aldeko banderolak zein ikurrinak ateratzera deitu dute, besten irekieran. Bestalde, larunbatean 11:00etatik aitzina elgarretaratzea eginen dute Réduit plazan. Igandean, erran bezala, bazkaria izanen da txosna gunean. Epaixka ostatua besta egun guzietan egonen da irekia.
Euskaldun, parekide eta herritarrak
Goiburu hori eman diote gazteek antolatutako txosna gune eta egitarauari. Izan ere, hori baita txosna gunea antolatzearen helburuetariko bat, besta alternatiboa antolatzea, balore euskaldun, parekide, eta herritarren pean.
