GAZAREN KONTRAKO ERASOA

Milatik gora dira Israelen erasoaldian hildakoak, palestinar zibilak gehienak

Lau orduz luzatu du Israelek su-etena, gauerdira arte —23:00ak Euskal Herrian—. Goizaldean Israelek hamabi zibil palestinar hil ditu eta 50 inguru zauritu eraikin bat bonbardatuta.

Gaza suntsituta

Arantxa Elizegi -

2014ko uztailak 26

Goizeko 07:00etan sartu da indarrean su-eten humanitarioa, eta hamabi orduz luzatzea adostua zuten bi aldeek. Hura amaitzear zela, ordea beste lau orduz luzatuko dutela iragarri dute, gauerdira arte —23:00ak Euskal Herrian—. Nazioarteak, NBEren bitartekaritzarekin, egindako menia luzeago baten proposamena aztertzeko baliatuko dute bi aldeek su-etena. Gazan, berriz, zaurituak artatu eta hondakin artean geratutako gorpuak ere ateratzeko baliatu dute barealdia.

Aurretik, ordea, Israelek etxebizitza eraikin bat bonbardatu eta gutxienez 35 pertsona hil ditu eta 50 zauritu, tartean familia bereko hogei kide. "Su-etena indarrean sartu baino minutu batzuk lehenago bonbardatu udte etxea. Menia hasi aurretik ahalik eta minik handiena egin nahiko balute bezala", salatu du Beit Khanumgo herritar batek.

Ez da goizeko eraso bakarra izan. Gurutze Gorriak salatu du beraien anbulantzietako bat ere tirokatu eta langile bat hil duela Israelgo Armadak.

Milatik gora dira hildakoak eta 6.000 baino gehiago zaurituak. Bizirik atera direnak, berriz, ez dute nora joanik, ez aterperik. Euren etxeak suntsitu ditu Israelek, eta NBEren aterpeetan ere ez dira seguru sentitzen, izan ere, haiek ere jomuga bilakatu ditu Tel Avivek.

NBEk bultzatuta onartu dute bi aldeek etenaldia, dena den, eta Al Jazeera-k ohartarazi duenez, zail da menia Gaza osoan errespetatzen dela bermatzea. "Menia berez indarrean egon arren, leherketak entzun ditugu Gazako zenbait eremutan", adierazi du Al Jazeerako kazetari Nicole Johnstonek.

Parisen, berriz, nazioarteko atzerri ministroak biltzekoak dira Israel eta Hamasen arteko su-eten mugagabea bultzatu asmoz. AEBetako Gobernuak proposatu du zazpi eguneko menia bat adostea eta epe hori elkarrizketak hastea. Israelek, ordea, atzera bota zuen atzo egitasmoa. Dena den, John Kerry AEBetako Estatu idazkariak nabarmendu du "terminologia" dela akordioa lortzeko arazo nagusia, eta baikor agertu da.

Paristik hain zuzen ere gaurko su-etena beste 24 orduz luzatzeko eskatu diete bi aldeei, eta hura nahi adina aldiz luzatzeko aukera aztertzeko, negoziazioak errazte aldera.

Hamaseko buru Osama Hamdanek, berriz, ohartarazi du su-eten iraunkorrik egongo bada Israelek setioa eten eta pasabideak zabaldu beharko dituela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna